Башич ҚПЛ-дегі «Елімайға» қарсы ірі жеңіс туралы айтты
«Астананың» жартылай қорғаушысы Иван Башич Sports24.kz тілшісіне Қазақстан Премьер-лигасының 25-турында семейлік «Елімайды» 4:0 есебімен ойсырата жеңгеннен кейінгі эмоциясымен бөлісті.
«Бәрі ойдағыдай болды. Меніңше, тағы бір-екі гол соғуға болатын еді, бірақ, Құдайға шүкір, ірі есеппен жеңдік. Біз жеңіске өте аш едік, төрт голдан кейін де одан сайын көп гол соққымыз келді», — деді Иван Башич.
Хавбек Каримов соққан пенальти туралы
Осы кездесуде пенальти орындап, хет-трик жасау мүмкіндігі туралы сұраққа Иван бұл өзі үшін маңызды емес екенін айтты.
«Барлығы гол соққаны жақсы. Рамазанның гол соққанына өте қуаныштымын. Ол шабуылшы, гол соғуы керек. Сондықтан пенальтиді сәтті орындағаны жақсы болды. Мен ол үшін өте қуаныштымын», — деді жартылай қорғаушы.
«Астананың» ірі жеңісі
Еске салайық, «Астана Аренада» өткен кездесу алаң иелерінің 4:0 есебіндегі жеңісімен аяқталды. Бірінші таймның басты қаһарманы Иван Башич болды. Ол дубль жасап, елордалық клубқа үзіліске дейін сенімді басымдық сыйлады.
Екінші тайм басталғаннан кейін де «Астана» ойынды бақылауын жалғастырды. 49-минутта Марин Томасов есепті 3:0-ге жеткізсе, жиырма минуттан кейін Каримов пенальтиді сәтті орындап, матчтың қорытынды есебін белгіледі.
Осы жеңістен кейін «Астана» 45 ұпай жинап, ҚПЛ турнир кестесінде үшінші орында қалды. «Елімай» 32 ұпаймен алтыншы орында тұр.
Келесі матчта елордалық клуб турнир кестесінің көшбасшысы шымкенттік «Ордабасымен» кездеседі.
