«Барселона» дағдарыста ма? Флик «Севильядан» алған масқара жеңілістен кейін ақталды
«Барселонаның» бас бапкері Ханс-Дитер Флик Ла Лиганың 8-турында «Севильядан» 1:4 есебімен жеңілгеннен кейін өз ойын айтты. Маманның айтуынша, осындай ауыр сәтке қарамастан, «блауграна» сенімін жоғалтпай, маусымды соңына дейін жігермен өткізуге тиіс.
«Біз – мықты командамыз, және жарақат алған ойыншыларымыз біртіндеп қатарға қосылып жатыр. Бұған позитивті тұрғыдан қарауымыз керек. Екінші таймда көрсеткен реакцияға ризамын», – деді Флик.
Сонымен қатар ол мәселе тактикада емес, жіберілген өрескел қателіктерде екенін атап өтті.
«Мәселе жүйеде емес. Біз әрқашан бірдей ойнаймыз. Бірақ бүгін көп нәрсе ойдағыдай болмады: бірінші тайм сәтсіз өтті, ал екінші кезеңде біз жағдайды түзетуге тырыстық. Мұндай ойындардан сабақ алып, алда мықтырақ оралуымыз керек».
Айта кетейік, кездесу 5 қазанда «Рамон Санчес Писхуан» аренасында өтті. «Севилья» «Барселонаны» сенсациялық түрде ойсырата жеңді – 4:1.
