Бабаян «Астана» үшін шешуші күн болатынын анонстады
«Астананың» бас бапкері Григорий Бабаян ҚПЛ-дің 25-турында «Елімайды» (4:0) ойсырата жеңгеннен кейін елордалық клубта 7 қыркүйекте болуы тиіс маңызды оқиғаны анонстады, деп хабарлайды Sports24.kz.
«Ертеңгі күнді күтейік. Ертең біз үшін маңызды оқиға болуы тиіс. Сондықтан күтіп отырмыз. Бүгін ештеңеге түсініктеме бермейміз. Мен бізде келісімдер бар екенін айттым. Барлығымыз ертеңгі күнді күтіп отырмыз. Сондықтан бұдан артық ештеңе айта алмаймын», – деді Бабаян.
Бұған дейін «Астанада» жалақы бойынша берешекке байланысты елеулі ішкі дағдарыс туындауы мүмкін екені хабарланған еді. Елордалық команданың футболшылары жалақы бойынша қарызға байланысты шектен тыс шараларға баруы мүмкін деген ақпарат тарады. Егер берешек 7 қыркүйекке дейін өтелмесе, ойыншылар жаттығулар мен ресми матчтарға қатысудан бас тартуға дайын екені айтылған.
«Елімайды» (4:0) ойсырата жеңгеннен кейін Бабаян шәкірттері ҚПЛ турнир кестесінде үшінші орында келеді және еурокубок аймағы үшін күресте жақсы мүмкіндіктерін сақтап отыр. Елордалық клубтың еншісінде 45 ұпай бар.
