Рыбакинаның орнына қатысқан Костюк күтпеген мәлімдеме жасады: ол не айтты
Украиналық теннисші Марта Костюк АҚШ-тың Индиан-Уэллс қаласында өтіп жатқан WTA-2026 қорытынды турниріндегі күтпеген дебюті туралы айтып берді. Жарысқа қосалқы қатысушы ретінде келген спортшы әлемнің бірінші ракеткасы Елена Рыбакина бас тартқаннан кейін негізгі құрамнан орын алды, деп хабарлайды Sports24.kz.
Қазақстандық теннисшінің шешімі Костюктің жоспарын турнир басталардан бір күн бұрын өзгертті. 24 жастағы спортшы чехиялық Линда Носковамен кездесуге шығатынын матчқа небәрі бір күн қалғанда білген.
Ойыннан кейінгі баспасөз мәслихатында Марта мұндай жағдайды мүлде күтпегенін мойындады.
«Турнирдің алғашқы күнінде-ақ кортқа шығамын деп ойлаған жоқпын. Шынымды айтсам, бұл жарыста ойнауға мүмкіндік туады деп те күтпедім», – деді Костюк.
Алайда қорытынды турнирге күтпеген жерден қатысу украиналық теннисші үшін жалғыз қиындық болған жоқ. Белгілі болғандай, соңғы үш айда ол үнемі ауырсынуды сезініп, толыққанды жаттығу өткізе алмаған.
Спортшының айтуынша, Носковамен кездесу өткен күн осы уақыт аралығында ауырсыну мазаламаған екінші күн ғана болған. Бұған дейін Костюк оң білегіндегі жарақатына байланысты Билли Джин Кинг кубогының финалдық кезеңіне қатыса алмаған еді.
Украиналық теннисші әзірге өзінің үздік бабына оралмағанын да жасырмады. Жаттығулардағы үзілістер ойын тәжірибесіне әсер еткен. Әсіресе допты ойынға қосу шеберлігін жетілдіру қажет екенін атап өтті. Дегенмен қазіргі уақытта ота жасату мәселесі қарастырылып жатқан жоқ.
«Қазір мен үшін ең маңыздысы – ауырсынусыз қайта ойнай алуым. Кортқа оралғаныма шын жүректен қуаныштымын. Маусым аяқталуға жақын, сондықтан осында келіп, жарысқа қатысып, жылды жақсы көңіл күймен аяқтауға мүмкіндік алғаныма ризамын», – деді теннисші.
Алайда WTA қорытынды турниріндегі алғашқы кездесу Костюк үшін сәтсіз аяқталды. Әлемдік рейтингте сегізінші орында тұрған Линда Носкова украиналық спортшыны екі сетте 6:2, 6:4 есебімен жеңді.
Чехиялық теннисші кездесуді сенімді бастап, алғашқы партияны небәрі 31 минутта өз пайдасына шешті. Екінші сетте Марта қарсыласына қарсылық көрсетуге тырысқанымен, есеп 2:2 болған сәтте Носкова брейк жасап, басымдығын матч соңына дейін сақтап қалды.
1 сағат 26 минутқа созылған бұл кездесу Костюктің биылғы маусымда чехиялық қарсыласынан қатарынан үшінші рет жеңілуімен аяқталды. Бұған дейін Носкова оны Уимблдон мен US Open турнирлерінде де ұтқан болатын.
Сәтсіз басталғанына қарамастан, украиналық теннисшінің жартылай финалға шығу мүмкіндігі әлі бар. Топтық кезеңдегі қалған екі матчта ол америкалық Кори Гауфф және Джессика Пегуламен кездеседі.
Еске салайық, Костюк денсаулығына байланысты WTA қорытынды турнирінен бас тартқан Елена Рыбакинаның орнына қатысты. Қазақстандық спортшы 2025 жылы Эр-Риядта жеңіп алған чемпиондық атағын қорғауы тиіс еді. Алайда вирустық инфекцияға байланысты маусымды мерзімінен бұрын аяқтап, 2027 жылғы жарыстарға дейін толық қалпына келуге көңіл бөлуді жөн көрді.
