«Қазақстан аса көп голдық мүмкіндік жасаған жоқ»: Молдова бапкері ван ’т Схип командасын жеңгенін түсіндірді
Маман шәкірттерінің ұйымшыл ойынын атап өтіп, жеңіс ұжымдық еңбектің нәтижесі болғанын айтты, деп хабарлайды Sports24.kz Moldfootball.com сайтына сілтеме жасап.
Молдова құрамасының бапкерінің айтуынша, жеңіске футболшылардың қорғаныста да, шабуылда да үйлесімді әрекет етуі шешуші рөл атқарды. Попеску екі гол соққан ойыншының нәтижелі ойынына қарамастан, жекелеген футболшыларды ерекше атап өтуден бас тартты.
«Ешкімді бөле-жарғым келмейді. Менің түсінігімде, қорғаныс шабуылшылардан басталады, футболды осылай көремін. Бүкіл команда қорғанады, бүкіл команда шабуылдайды. Қазақстан аса көп мүмкіндік жасаған жоқ, бұл тек қорғаныстың ғана емес, бүкіл команданың еңбегі. Петруды екі голымен құттықтаймын, бірақ бұл тек оның жетістігі емес, бүкіл команданың жұмысының нәтижесі», - деді Попеску.
Ұлттар лигасының бесінші турындағы кездесу Кишинёвте өтіп, алаң иелерінің 2:1 есебімен жеңісімен аяқталды. 38-минутта Петру Попеску алыстан дәл соққы жасап, есеп ашты. Үзілістен кейін Қазақстан құрамасы белсенділігін арттырып, есепті теңестірді. Қарымта голдың авторы Ислам Чесноков болды. Алайда Джон ван ’т Схип шәкірттері тең есепті сақтап қала алмады. 77-минутта Никита Моцпанның пасын пайдаланған Петру Попеску тағы да гол соқты. Бұл оның матчтағы екінші голы еді және Молдова құрамасына жеңіс әкелді.
Бұл жеңіліс Қазақстан құрамасының турнирлік жағдайын қиындатты. Бес турдан кейін Джон ван ’т Схип командасының еншісінде небәрі екі ұпай бар, ол C3 тобында төртінші орында тұр. Жеңістің арқасында Молдова жеті ұпай жинап, турнир кестесінде екінші сатыға көтерілді.
Енді Қазақстан топтық кезеңді квартет көшбасшысы Словакия құрамасына қарсы өз алаңындағы матчпен аяқтайды. Кездесу 16 қарашада «Астана Аренада» өтеді.
