«Оның мансабын аяқтайтыны белгілі еді»: «Ақтөбе» бапкері Черевченко Нанидің футболдан кетуі туралы пікір білдірді
«Ақтөбенің» бас бапкері Игорь Черевченко «Манчестер Юнайтед» пен Португалия құрамасының бұрынғы жартылай қорғаушысы Луиш Нанимен бірге жұмыс істеген әсерімен бөлісті. Мамамандар Қазақстан Премьер-лигасына бейімделудің қиындықтары туралы айтып, португалиялық футболшы Ақтөбе клубынан кеткеннен кейін ойыншылық мансабын аяқтады деп болжады, деп хабарлайды Sports24.kz «Чемпионатқа» сілтеме жасап.
Черевченконың айтуынша, Қазақстанда жұмыс істеу ол үшін жаңа тәжірибе болды. Ресейлік маман «Ақтөбеге» тағайындалғаннан кейін белгілі бір қиындықтарға тап болғанын мойындады, өйткені жергілікті чемпионат пен оған қатысушылар туралы дерлік хабары болмаған.
«Қазақстан чемпионаты РПЛ-ден менталитетімен ерекшеленеді. Бірақ мен клубта бар болғаны үш ай жұмыс істедім, чемпионатты білмедім. Өзім үшін өте үлкен қиындықтар болды: ойыншыларды да, лиганы да білмедім. Жұмыс барысында зерттеуге тура келді», - деді Черевченко.
Сонымен қатар, «Ақтөбе» бапкері ҚПЛ деңгейіне оң баға беріп, Қазақстан чемпионатына сапалы шетелдік футболшылар, соның ішінде әлемдік футбол жұлдыздары келетінін атап өтті. Маманының ерекше назарын 2026 жылғы маусымда «Ақтөбе» сапында өнер көрсеткен Луиш Нани аударды.
«Бұл қызықты лига, мұнда жақсы ойыншылар мен футбол жұлдыздары келеді. Біздің «Ақтөбеде» Нани ойнады. Ол барлық жағынан өте мықты футболшы. Мұндай футбол мектебінен өтіп, осындай өмір жолын бастан кешкен, «Манчестер Юнайтед» секілді клубтарда және Португалия құрамасында ойнаған адам. Мұның өзі көп нәрсені аңғартады», - деді маман.
Бір қызығы, Черевченко мен Нани Қазақстанда бірге жұмыс істегенге дейін де таныс болған. Олар алғаш рет Еуропа лигасында жолықты: ресейлік бапкер жаттықтырған мәскеулік «Локомотив» сол кезде португалиялық футболшы ойнаған түркиялық «Фенербахчумен» кездесті.
«Онымен алғаш рет «Локомотив» Еуропа лигасында «Фенербахчумен» ойнағанда жолықтық, ол кезде ол бізге қарсы ойнады. «Ақтөбеде» бірге жұмыс істегенде сол ойындарды да еске алдық», - деді Черевченко.
Бапкер португалиялық футболшының болашағына да тоқталды. Оның айтуынша, маусымның соңғы ойындарының өзінде Нанидің мансабын аяқтауға жақын екені байқалған.
«Оның бір жылдық келісімшарты болды, маусымды толық өткізді. Естуімше, біздің командадан кеткеннен кейін футболшылық мансабын аяқтаған. «Ақтөбе» сапындағы соңғы ойындарында оның карьерасын аяқтап жатқаны белгілі болды», - деді бапкер.
Еске салайық, 39 жастағы Луиш Нани Қазақстан клубына ауысу үшін 2026 жылдың қаңтарында ойыншылық мансабын қайта жалғастырды. Маусым бойы португалиялық жартылай қорғаушы барлық турнирде 26 матч өткізіп, үш гол соғып, бес нәтижелі пас берді. «Манчестер Юнайтед» пен Португалия құрамасының бұрынғы ойыншысының келуі 2026 жылы Қазақстан футболындағы ең елеулі трансферлердің бірі болды. Игорь Черевченко «Ақтөбені» 2026 жылдың шілдесінде қабылдады. Маусым қорытындысы бойынша ақтөбеліктер Қазақстан Премьер-лигасының турнирлік кестесінде бесінші орын алды.
