Алиптің «Галатасарайға» ауысуы күтпеген арнаға бұрылды: қазақстандықтың өкілдері шындықты ашты
Санкт-Петербургтің «Зениті» мен Қазақстан құрамасының қорғаушысы Нұралы Әлиптің өкілдері футболшының түркиялық «Галатасарайға» ауысуы мүмкін екені туралы ақпаратқа түсініктеме берді, деп хабарлайды Sports24.kz.
Бұған дейін түркиялық журналист Бурак Эрен Ыстанбұл клубына 26 жастағы қазақстандықтың кандидатурасын қарастыру ұсынылғанын хабарлаған еді. Әлеуетті трансфердің артықшылықтарының бірі Әлиптің Түркия чемпионатындағы мәртебесі болады деп болжанған. Яғни ол бұл елде легионер болып саналмайды деген ақпарат тарады.
Алайда футболшының мүддесін қорғайтын PC Management агенттігі тараған ақпаратты жоққа шығарды.
Қорғаушының өкілдерінің айтуынша, «Галатасарай» футболшының өзіне де, «Зенит» басшылығына да ешқандай ресми ұсыныс жасамаған. Оның үстіне агенттік тараған ақпараттың шындыққа жанаспайтынын мәлімдеді.
Қазақстандықтың өкілдері шетелдік футболшылар лимитіне қатысты қате мәліметтерге де арнайы тоқталды. Олар Түркия чемпионатының ережелері өзгергенін және Қазақстан ойыншыларына қатысты бұрынғы шарттардың енді қолданылмайтынын атап өтті.
Сонымен қатар агенттік Әлиптің болашағына қатысты мәлімет берді. Қорғаушының Санкт-Петербург клубымен қолданыстағы келісімшарты 2028 жылдың жазына дейін жарамды. Алайда келісімді ұзарту жөніндегі келіссөздер әзірге жеделдетіліп жатқан жоқ.
Футболшының өзі «Зениттің» негізгі құрамынан орын алу үшін күреске бар назарын аударып, командасымен бірге кезекті чемпиондық атақты жеңіп алуды көздеп отыр.
Осылайша, Әлиптің «Галатасарайға» ауысуы мүмкін екені туралы ақпарат әзірге расталған жоқ. Бұған қоса, ресейлік БАҚ мәліметінше, қазақстандық қорғаушы түркиялық алпауыттың трансферлік жоспарларына кірмейді.
