«Барлық хейтерлердің аузын жапты»: сарапшы Торехан Сабырханның Азия ойындарындағы триумфы туралы
Қазақстандық боксшы Торехан Сабырхан 70 келіге дейінгі салмақта 2026 жылғы Азия ойындарының чемпионы атанды, деп хабарлайды Sports24.kz.
Сабырханның алтын медалі Қазақстан үшін бокстан Азия ойындарындағы соңғы 12 жылдағы алғашқы жүлде болды. Қазақстандық боксшылар соңғы рет 2014 жылы Инчхонда (Оңтүстік Корея) өткен Азия ойындарында тұғырдың ең биік сатысына көтерілген еді.
Торехан жеңіске жеткеннен кейін сарапшы әрі бокс жаттықтырушысы Алмас Жақыпов Sports24.kz тілшісіне берген сұхбатында қазақстандық боксшының Ишаиштан қалай реванш алғанын айтып, оның турнирдегі өнеріне баға берді.
«Тореханды әрдайым осындай күйде көргіміз келеді»
Жақыпов Сабырханның Азия ойындары барысында көрсеткен шеберлігі мен байсалдылығына тоқталды. Маманың айтуынша, қазақстандық боксшы қарсыластарына өз стилін таңып, қысымға берілмеген.
«Тореханды әрдайым осындай күйде көргіміз келеді. Қарсыластарын сабырлылығы мен прессингі арқылы сындыратын тәжірибелі әрі мықты боксшы».
«Тактика өте дұрыс таңдалды»
Финалда Сабырхан бірнеше ай бұрын Азия чемпионатының шешуші жекпе-жегінде жеңілген Ишаишпен кездесті. Жақыпов бұл жолы Қазақстан құрамасы жекпе-жекке дұрыс тактика таңдағанын атап өтті.
«Иорданиялық боксшыға қарсы финалда тактика өте дұрыс таңдалды. Алға ұмтылып, қарсыласқа екінші қарқынмен қарсы шабуыл жасауға мүмкіндік берудің қажеті болмады».
«Барлық хейтерлердің аузын жапты»
Сарапшы сонымен қатар Азия ойындарындағы алтын медаль Сабырханды сынағандарға берілген жауап болды деп есептейді. Оның айтуынша, кейбір сыншылар Азия чемпионатының финалындағы жеңілістен кейін жас боксшыдан тым тез түңіліп кеткен.
«Меніңше, Торехан бұл өнерімен бір ғана финалдағы жеңілісіне бола жас боксшының жолын сызып тастаған және оның алға жылжуына назар аудармаған барлық хейтерлердің аузын жапты».
Жақыпов енді Сабырханның алдына жаңа мақсаттар қойып отыр. Олар — өз жерімізде өтетін әлем чемпионатында алтын медаль және Олимпиада алтыны.
«Енді Тореханның 2027 жылғы өз елімізде өтетін әлем чемпионатында алтын алып, 2028 жылы Лос-Анджелесте көптен күткен Олимпиада алтынын жеңіп алғанын қалаймыз».
«Бұл жағдайда тек Абылайхан Жүсіповті аяйсың»
Сонымен қатар Жақыпов Сабырханның жетістігі Қазақстан құрамасындағы орын үшін оның басты бәсекелестерінің бірі — 2025 жылғы әлем чемпионы Абылайхан Жүсіповтің мансабына айтарлықтай әсер етуі мүмкін деп санайды.
«Бұл жағдайда тек Абылайхан Жүсіповті аяйсың. 2025 жылғы әлем чемпионы, өкінішке қарай, 2027 жылғы өз елімізде өтетін әлем чемпионатына қатысу мүмкіндігін ала қоюы екіталай. Ал Олимпиада туралы тіпті ұмытуына тура келуі мүмкін».
Ал Қазақстанға бокстан екінші алтынды өзбекстандық боксшыны ойсырата жеңген Айбек Оралбай әкелді.
