WBC Мейірім Нұрсұлтановтың титулдық жекпе-жегін ресми растады
Бүкіләлемдік бокс кеңесі (WBC) орта салмақтағы уақытша титул үшін өтетін алдағы жекпе-жекті ресми түрде растады, деп хабарлайды Sports24.kz.
Жеңіліп көрмеген қазақстандық боксшы Мейірім Нұрсұлтанов WBC-нің уақытша чемпионы Хесус Рамос-кішімен кездеседі. Жекпе-жек 19 қыркүйекте АҚШ-тың Калифорния штатындағы Сан-Диего қаласында өтеді.
Нұрсұлтанов үшін бұл кездесу үш жылға жуық уақыттан кейінгі алғашқы жекпе-жек болмақ. Қазақстандық боксшы соңғы рет 2023 жылдың қарашасында рингке шығып, чилилік Хулио Аламосты төрешілердің бірауызды шешімімен жеңген.
Бұл жеңіс Нұрсұлтановтың кәсіпқой мансабындағы қатарынан 20-шы жеңісі болды.
Ал Рамос 2025 жылдың соңында Шейн Мосли-кішіді төрешілердің бірауызды шешімімен жеңіп, WBC-нің уақытша титулын иеленген.
Осылайша, 19 қыркүйекте Нұрсұлтанов ұзақ үзілістен кейін алғашқы жекпе-жегін өткізіп, орта салмақтағы WBC-нің уақытша чемпиондық титулын жеңіп алуға мүмкіндік алады.
Бұған дейін америкалық боксшы Хесус Рамос-кіші жеңіліп көрмеген қазақстандық Мейірім Нұрсұлтановпен өтетін жекпе-жек туралы пікір білдірген. Америкалық боксшы Нұрсұлтановты өз мансабындағы ең қиын қарсылас деп санамайтынын айтқан. Ол мысал ретінде Владимир Эрнандес, Джейсон Розарио және Шейн Мосли-кішімен болған жекпе-жектерін келтірді.
