Төрехан Сабырханның Азияда-2026-дағы жекпе-жегіне шолу
Қазақстан бокс құрамасының көшбасшыларының бірі Төрехан Сабырхан Айти мен Нагояда өтіп жатқан 2026 жылғы жазғы Азия ойындарындағы алғашқы жекпе-жегін сенімді өткізді, деп хабарлайды Sports24.kz.
70 келіге дейінгі салмақ дәрежесінің 1/8 финалында қазақстандық боксшы Катар өкілі Мохаммед Дбичимен кездесті.
Сабырхан алғашқы минуттардан-ақ бастаманы өз қолына алып, жекпе-жек барысын бақылауда ұстады. Әсіресе екінші раунд Төреханның басымдығымен өтті. Қазақстандықтың кезекті шабуылынан кейін төреші Дбичиге нокдаун санағын ашты.
Катарлық боксшы кездесуді жалғастырғанымен, жекпе-жектің барысын өзгерте алмады. Үш раундтың қорытындысы бойынша бес төрешінің барлығы жеңісті Сабырханға берді - 5:0.
Осылайша, Төрехан Азияда-2026 ширек финалына шығып, жүлде үшін күресін жалғастырады.
Айта кетейік, Сабырхан алғашқы айналымды өткізіп, жарысты бірден 1/8 финалдан бастады. Ал Дбичи 1/16 финалда Вьетнам өкілі Дук Нгок Нгуенді жеңген еді.
Қазақстан ерлер құрамасы Азия ойындарындағы бокс турниріне алты салмақ дәрежесінде қатысып жатыр. Бұған дейін 80 келіге дейінгі салмақта Сабыржан Аққалықов алғашқы жекпе-жегінде жеңіліп, жарысты аяқтаған болатын.
Назарларыңызға Төрехан Сабырханның жеңісті жекпе-жегіне шолу мен кездесудің ең жарқын сәттерін ұсынамыз.
