Бес мүмкіндік – бес алтын. Қазақстанның бокстан Әлем кубогындағы финал кестесі белгілі болды
Қазақстандық былғары қолғап шеберлері Қытайдағы World Boxing турнирінде бес алтын медаль үшін күш сынасады
ФОТО: НОК РК
Қазақстан құрамасы Гуиянда (Қытай) өтіп жатқан World Boxing Әлем кубогында сәтті өнер көрсетіп, бірден бес финалға жолдама алды, деп хабарлайды Sports24.kz.
Шешуші жекпе-жектерге ерлер командасынан үш боксшы — Санжар Тәшкенбай, Абылайхан Жүсіпов және Айбек Оралбай, сондай-ақ әйелдер құрамасынан екі спортшы — Назым Қызайбай мен Виктория Графеева шықты.
Финалдық айқастар жексенбі, 21 маусымда өтеді. Қазақстандық боксшылар қатысатын жекпе-жектердің кестесі төмендегідей:
- 09:15. Әйелдер, 54 кг дейін: Назым Қызайбай — Сирин Шаараби (Италия);
- 09:30. Әйелдер, 60 кг дейін: Виктория Графеева — Линь Юйтин (Тайвань);
- 10:15. Ерлер, 70 кг дейін: Абылайхан Жүсіпов — Дипак (Үндістан);
- 15:30. Ерлер, 50 кг дейін: Санжар Тәшкенбай — Асилбек Жалилов (Өзбекстан);
- 16:45. Ерлер, 90 кг жоғары: Айбек Оралбай — Никита Путилов (Германия).
Айта кетейік, бастапқыда Қазақстан құрамасы Гуияндағы Әлем кубогына 17 спортшы — тоғыз ер және сегіз әйел қатысты. Енді бірден бес спортшы беделді халықаралық турнирдің алтын медалі үшін айқасуға мүмкіндік алды.