Қазақстанның бірден бес боксшысы әлемдік рейтингте көш бастады
World Boxing ұйымы әуесқой боксшылардың жаңартылған әлемдік рейтингін жариялады. Жаңа тізімде қазақстандық былғары қолғап шеберлері бірнеше салмақ дәрежесінде көшбасшылық орнын сақтап қалды, деп хабарлайды Sports24.kz.
Қазақстан құрамасы әлемдік әуесқой бокстағы жоғары деңгейін тағы бір мәрте дәлелдеді. Қазіргі таңда бірден бес қазақстандық спортшы өз салмақ дәрежесінде әлем рейтингінің көшін бастап тұр.
Қазақстандықтар әлемдік бокстағы көшбасшылықты сақтап қалды
Жаңартылған рейтингте Санжар Тәшкенбай (50 келіге дейін), Махмұд Сабырхан (55 келіге дейін), Төрехан Сабырхан (70 келіге дейін), Айбек Оралбай (90 келіден жоғары) және Наталья Богданова (70 келіге дейін) бірінші орынға жайғасты.
Сонымен қатар тағы бірнеше қазақстандық боксшы әлем рейтингінде екінші орынға көтерілді. Олардың қатарында Назым Қызайбай (48 келіге дейін), Аида Әбікеева (65 келіге дейін) және Нұрбек Оралбай (80 келіге дейін) бар.
Қазақстан әлемдік рейтингтің үздік үштігіндегі орнын сақтады
Әлемнің үздік боксшылары қатарына Алуа Балқыбаева (51 келіге дейін), Надежда Рябец (80 келіге дейін), Дина Исламбекова (80 келіден жоғары), Оразбек Асылқұлов (60 келіге дейін), Сабыржан Аққалықов (75 келіге дейін) және Нұрбек Оралбай (85 келіге дейін) енді.
Қазақстан құрамасы Қытайдағы әлем кубогына дайындалып жатыр
Ұлттық құраманың келесі ірі жарысы - Қытайдың Гуйянь қаласында өтетін әлем кубогының кезеңі болмақ. Турнир 15-21 маусым аралығында ұйымдастырылады.
Бұған дейін Қазақстан құрамасының бас бапкері Елдос Сайдалин жарысқа қатысатын құрамды жариялаған болатын. Тізімге тоғыз спортшы енді. Олардың төртеуі - қазіргі әлем чемпиондары: Назым Қызайбай, Аида Әбікеева, Наталья Богданова және Алуа Балқыбекова.