АҚШ-та Хамза Шираздың Әлімханұлымен жекпе-жектен бас тартуының шынайы себебі анықталды
Британдық боксшы Хамза Шираз қазақстандық Жәнібек Әлімханұлымен жекпе-жектен допинг дауына байланысты емес, қаржылық шарттарға бола бас тартқан. Бұл туралы америкалық бокс шолушысы Дэн Каноббио мәлімдеді, деп хабарлайды Sports24.kz.
Каноббионың айтуынша, британдық боксшы қазақстандықпен чемпиондық титулды міндетті қорғау жекпе-жегі үшін алуы мүмкін болған гонорарға көңілі толмаған.
«Оған ұсынылған ақша ұнамады. Ол промоутерлік саудаға қатысып, Турки Әл әш-Шейхтен алып жүрген көтеріңкі гонорарларды емес, нарықтағы шынайы бағасын көрді. Мен өте мықты боксшы Жәнібекпен өзім жеткіліксіз деп санайтын ақша үшін жұдырықтасқым келмейді. Сондықтан ол белбеуден бас тартты», - деді Каноббио журналист Ариэль Хельванимен әңгімесінде.
Бұған дейін Шираздың мүддесін қорғайтын Queensberry Promotions промоутерлік компаниясы Әлімханұлымен жекпе-жекті ұйымдастыру құқығы үшін өткен саудада 1 001 809 доллар ұсынып, жеңіске жеткен еді. Қазақстандық боксшының командасы Top Rank 820 мың доллар ұсынды.
Сауда аяқталғаннан кейін британдық боксшы титулды міндетті қорғаудан бас тартып, WBO нұсқасы бойынша екінші орта салмақтағы әлем чемпионы белбеуін өз еркімен босатты.
Осыдан кейін Жәнібек Әлімханұлы жеңіліп көрмеген дат боксшысы Якоб Банкпен жекпе-жек өткізуге келісті. Боксшылар 2027 жылғы 23 қаңтарда Данияның Хорсенс қаласында кездеседі. Жекпе-жекте екінші орта салмақтағы WBO нұсқасы бойынша бос тұрған әлем чемпионы атағы сарапқа салынады.
Еске салайық, Жәнібек Әлімханұлы — WBO және IBF нұсқалары бойынша орта салмақтағы бұрынғы әлем чемпионы. Кәсіпқой бокстағы еншісінде 17 жеңіс бар, оның 12-сін нокаутпен аяқтаған.
