Рыбакинаның Стародубцеваны жеңуінің басты шарты аталды
Қазақстандық теннис сарапшысы әрі жаттықтырушы Артем Остапенко әлемнің екінші ракеткасы Елена Рыбакинаның WTA рейтингінде 58-орында тұрған украиналық Юлия Стародубцевамен US Open турнирінің төртінші айналымындағы алдағы кездесуіне қатысты пікір білдірді, деп хабарлайды Sports24.kz.
«Юлия Стародубцеваны, әрине, ешқашан бағаламауға болмайды. Олар жақында ғана “Ролан Гаррос” турнирінде ойнаған еді, сол кезде украиналық теннисші Рыбакинаны үш сетте жеңіп кеткен. Қалай болғанда да, қазір жағдай мүлдем басқа. “Ролан Гаррос” сияқты сазды корт емес, бұл — жылдам хард.
Бұл Рыбакинаның ойын мәнеріне әлдеқайда көбірек сәйкес келеді. Оның үстіне, Елена алғашқы екі матчта барынша үнемді ойнады. Бірде-бір сетте жеңілген жоқ және жалпы есепте кортта екі сағаттан артық уақыт өткізбеді. Сондықтан оның күші әлі де жеткілікті», — деді сарапшы.
Артем Остапенко турнирдің алдыңғы кезеңінде Юлия Стародубцева матч барысында жеңіліп жатып, грек теннисшісі Мария Саккариді камбэк жасап жеңгенін атап өтті.
«Елена үшін бұл жолы да басты қару — бірінші доптан берілетін соққы болады. Өйткені алдыңғы матчта бірінші сервисі өте жақсы жұмыс істеді, эйстері көп болды және ол белсенді ойнады.
Егер ол Стародубцеваның матчты ұзақ әрі созылыңқы ойындарға айналдыруына мүмкіндік бермей, өз сервисіндегі геймдерін де осылай жақсы бақылай алса, Рыбакина үшін аса қиындық болмауы керек. Қалай болғанда да, бұл матчта Рыбакина — айқын фаворит. Менің ойымша, кездесу Еленаның US Open-дегі алдыңғы матчтарына қарағанда әлдеқайда қиын болады», — деп қосты ол.
Бұған дейін Елена Рыбакина US Open турнирінің екінші айналымында WTA рейтингінде 105-орында тұрған испаниялық Джессика Боусас Манейродан екі сетте басым түскен еді (6:2, 6:4).
Бәс өте жоғары
US Open қорытындысы бойынша Елена Рыбакинаның мансабында алғаш рет жекелей сында әлемнің бірінші ракеткасы атанып, Арина Соболенконы басып озуға мүмкіндігі бар. Ол үшін турнирдің жартылай финалына шығуы қажет.
Айта кетейік, бұған дейін Юлия Стародубцеваның Елена Рыбакина үшін өте қауіпті қарсылас екенін жазған едік.
