Стародубцева кімге танымал – US Open турниріндегі Рыбакинаның келесі қарсыласы
Қазақстандық теннисші Елена Рыбакина US Open-2026 турнирінің үшінші айналымына шықты. Енді оның қарсыласы украиналық Юлия Стародубцева болады. Матч 5 қыркүйекте Нью-Йоркте өтеді.
Қазақстандық теннисші үшін бұл кездесу ерекше маңызды болмақ. Өйткені қазіргі таңда өзара кездесулерде Рыбакина украиналық қарсыласына 0:1 есебімен жол беріп тұр.
Олардың жалғыз кездесуі жақында ғана – Roland Garros-2026 турнирінің екінші айналымында өтті. Сол кезде екінші нөмірлі спортшы ретінде жарысқа қатысқан Рыбакина алғашқы сетте 6:3 есебімен жеңіске жеткен. Алайда Стародубцева матч барысын толығымен өзгертіп, кейінгі екі партияда – 6:1, 7:6 (7:4) есебімен басым түсті. Roland Garros турнирінің ресми сайтының мәліметінше, кездесу 2 сағат 28 минутқа созылған.
Бұл жеңіс украиналық теннисшінің мансабындағы ең ірі жетістік болды. Сонымен қатар Стародубцева Roland Garros тарихында әлемдік рейтингтің топ-5 қатарындағы теннисшіні үшінші сеттегі тай-брейкте жеңіп, матчта жеңіске жеткен алғашқы спортшы атанды.
Юлия Стародубцева кім?
Стародубцева 26 жаста. Ол 2000 жылғы 17 ақпанда Украинада дүниеге келген. Тенниспен бес жасынан бастап айналысады және оң қолмен ойнайды. 17 жасында спортшы АҚШ-қа көшіп, Вирджиния штатындағы Old Dominion University оқу орнына түсті.
Қазір украиналық теннисші WTA рейтингінде 58-орында тұр. Оның мансабындағы ең жоғары көрсеткіші – 2026 жылдың сәуірінде көтерілген 53-орын.
Стародубцеваның қазіргі деңгейге жету жолы біртіндеп қалыптасты. 2024 жылдың басында ол әлемдік рейтингте шамамен 150-орында тұрған. Алайда кейін қарқынды дами бастады. 2024 жылы украиналық спортшы алғаш рет Бейжіңдегі WTA 1000 турнирінің ширек финалына шықты. Ал 2025 жылы Мадридте төртінші айналымға, Roland Garros-та үшінші айналымға дейін жетті.
Сонымен бірге Стародубцеваның WTA деңгейіндегі жекелей сында әзірге чемпиондық атағы жоқ.
Australian Open чемпионын жеңген
Стародубцеваның осы маусымдағы басты жетістіктерінің бірі Чарльстондағы турнирде тіркелді.
Америкалық жарыстың жартылай финалында украиналық теннисші сол кезде Australian Open-2025 турнирінің қазіргі чемпионы болған Мэдисон Кизбен кездесті. Стародубцева мансабындағы ең үздік матчтарының бірін өткізіп, америкалық қарсыласын екі сетте – 6:1, 6:4 есебімен сенімді жеңді. Кездесу небәрі 1 сағат 13 минутқа созылды.
Финалда украиналық теннисші бірінші нөмірлі фаворит Джессика Пегулаға 2:6, 2:6 есебімен есе жіберді. Дегенмен шешуші матчқа дейін жетудің өзі оның WTA турнирлеріндегі ең ірі жетістігі болды. WTA-ның ресми статистикасында да Чарльстон-2026 Стародубцеваның мансабындағы WTA деңгейіндегі алғашқы финалы ретінде көрсетілген.
US Open-да тағы да рейтингі жоғары қарсыластарын жеңді
Нью-Йоркте Стародубцева әзірге екі матч өткізіп, екеуінде де жеңіске жетті.
Бірінші айналымда украиналық теннисші Германия өкілі Элла Зайдельді аса қиындықсыз 6:2, 6:2 есебімен жеңді. Стародубцева бес эйс жасап, алты брейк-пойнттың төртеуін пайдаланды және жалпы ойналған ұпайлардың 61,8 пайызын жеңіп алды.
Екінші айналымда оны әлдеқайда мықты қарсылас – жарыстың 32-ракеткасы, Грекия өкілі Мария Саккари күтіп тұрды. Украиналық теннисші алғашқы сетте жеңіліп қалғанымен, матч барысын өзгертіп, үш партияда жеңіске жетті.
Осылайша Стародубцева үшінші айналымға жолдама алу жолында рейтингте өзінен әлдеқайда жоғары тұрған екі қарсыласын қатарынан жеңді.
Рыбакина нені ескеруі керек?
Стародубцева матчтарды созып ойнауымен және бір сетте жеңілгеннен кейін де күресті тоқтатпауымен ерекше қауіпті. Ол мұны Парижде Рыбакинаға қарсы матчта көрсетіп, кейін Нью-Йоркте де қайталады.
Украиналық теннисші хард жабындысын ұнатады, ал WTA оның сүйікті соққысы форхенд екенін атап өтеді. Стародубцеваның бойы – 1,72 метр.
Рыбакина үшін алдағы матч Roland Garros-тағы күтпеген жеңілістің қарымтасын қайтаруға мүмкіндік береді. Қазақстандық теннисші турнирге әлемнің екінші ракеткасы мәртебесінде келіп отыр. Ол екінші айналымда испаниялық Джессика Боуас Манейромен 6:2, 6:4 есебімен сенімді жеңіске жетті.
Алайда Стародубцеваны бағаламауға болмайды. 2026 жылы ол әлемнің екінші ракеткасын жеңіп, Australian Open чемпионын жарыстан шығарды және мансабында алғаш рет WTA турнирінің финалына шықты. Енді украиналық теннисші маусымның ең ірі хард турнирінде тағы бір сенсация жасауға мүмкіндік алды.
Рыбакина үшін бұл US Open-ның жай ғана үшінші айналымындағы матч емес, Париждегі жеңілістің кездейсоқтық болғанын дәлелдеуге берілген мүмкіндік болмақ.
