Рыбакина US Open турнирінің 1/8 финалына шыққаны үшін қанша табыс тапты
Елена Рыбакина US Open-2026 турниріндегі сәтті өнерін жалғастыруда. Үшінші айналымда қазақстандық теннисші украиналық Юлия Стародубцеваны жеңіп, 1/8 финалға жолдама алды, деп хабарлайды Sports24.kz.
Кездесу Рыбакинаның екі сеттегі жеңісімен аяқталды - 7:6 (8:6), 6:3. Қазақстандық теннисші Нью-Йорктегі турнирде әзірге бірде-бір сетте жеңілген жоқ және қатарынан үшінші жеңісіне қол жеткізді.
Төртінші айналымға шығу Рыбакинаға 480 мың доллар жүлде қаржысын қамтамасыз етті. Бір доллар 455,43 теңге бағамымен есептегенде, бұл шамамен 218,6 миллион теңгені құрайды.
Сонымен қатар Елена осы кезеңге жеткені үшін 240 рейтингтік ұпай алды. Енді қазақстандық теннисші ширек финал жолдамасы үшін сынға түседі.
Рыбакина бұған дейінгі екі кездесуін де екі сетте аяқтады. Бірінші айналымда ол америкалық Теа Фродинді 6:3, 6:2 есебімен жеңсе, екінші кезеңде испаниялық Джессика Боусас Манейродан 6:2, 6:4 есебімен басым түсті.
Айта кетейік, Рыбакина бұған дейін US Open турнирінде 1/8 финалдан әрі асып көрмеген. Сондықтан келесі жеңіс Еленаға Нью-Йорктегі жеке рекордын жаңартуға мүмкіндік береді.
Биылғы US Open турнирінің жалпы жүлде қоры 37,84 миллион долларды құрайды. Әйелдер арасындағы жекелей сынның жеңімпазы 5,5 миллион доллар, яғни көрсетілген бағам бойынша шамамен 2,5 миллиард теңге және 2000 рейтингтік ұпай алады.
1/8 финалда Рыбакинаның келесі қарсыласы жапониялық Наоми Осака болады. Жеңіске жеткен жағдайда Елена алғаш рет US Open ширек финалына шығып, турнирдегі жүлде қаржысын одан әрі арттырады.
