Рыбакина US Open-2026 турнирінің ширек финалында қандай қиындықтарға тап болғанын айтты
Елена Рыбакина US Open-2026 турнирінің ширек финалында қытайлық Чжэн Циньвэньді жеңгеннен кейін матч кестесінің өзіне оңай тимегенін айтты. Бұл кездесу күндіз өтті, ал бұған дейін қазақстандық теннисші турнирдегі ойындарының басым бөлігін кешкі уақытта өткізген, деп хабарлайды Sports24.kz.
Баспасөз мәслихатында Рыбакинадан күндізгі ыстықта ойнау мен түннің бір уағында кортқа шығудың қайсысын қолайлы көретіні сұралды.
«Шынымды айтсам, екі нұсқаның да оңайы жоқ сияқты. Кеш өтетін матчтар да өте ауыр. Тіпті жеңген күннің өзінде қалпына келуге уақыт аз қалады, әсіресе ерлер үшін бұл қиын. Мүмкін, таңертең бір-екі матч өткізіп алсаң, кейін жеңілдеу болатын шығар. Білмеймін. Бүгін мен де өзіме де, командама да біраз шағымдандым. Бірақ соңында ойынға бейімделудің жолын таптым. Енді таңертең де, кешке де ойнап көрдім, сондықтан шағымданатын ештеңе қалмады», – деді Рыбакина.
Бұл Еленаның биылғы US Open турниріндегі күндізгі уақытта әрі күн астында өткізген алғашқы матчы болды. Ширек финалға дейін ол жарыс жолын сенімді өткізсе, Чжэнге қарсы кездесуде алғаш рет бірінші сетті жеңіліспен бастап, кейін матч барысын өзгертуге тура келді.
Еске салайық, қазақстандық теннисші алғашқы партияда 3:6 есебімен ұтылғанымен, кейінгі екі сетті 6:1, 6:4 есебімен өз пайдасына шешті. Осы жеңістің арқасында Рыбакина мансабында алғаш рет US Open жартылай финалына шығып, сонымен бірге әлемнің бірінші ракеткасы атануға кепілдік алды. WTA рейтингінің жаңартылған нұсқасында ол ресми түрде бірінші орынға көтеріледі.
