Елена Рыбакина US Open-2026 турнирінің үшінші айналымына шыққаннан кейін қанша табыс тапты
Елена Рыбакина US Open-2026 турниріндегі сәтті өнерін жалғастырып келеді. Әлемнің екінші ракеткасы екінші айналымда испаниялық Джессика Боузас Манейроны жеңіп, жарыстың келесі кезеңіне жолдама алды, деп хабарлайды Sports24.kz.
Үшінші айналымға шығу қазақстандық теннисшіге титул үшін күресті жалғастыруға ғана емес, қомақты жүлде ақшасына ие болуға мүмкіндік берді. Рыбакина қазірдің өзінде 290 мың доллар және 130 рейтингтік ұпайға кепілдік алды.
Қазақстан Ұлттық банкінің ресми бағамы бойынша бір доллар 455,86 теңге тұрады. Осылайша, Рыбакинаның US Open турниріндегі қазіргі табысы шамамен 132,2 миллион теңгені құрайды.
Елена турнирді 17 жастағы америкалық Тея Фродинге қарсы сенімді жеңіспен бастады. Қазақстандық теннисші алғашқы айналымда қарсыласын екі сетте - 6:3, 6:2 есебімен ұтты. Екінші айналымда да матчты ұзаққа созбай, Боузас Манейроны 6:2, 6:4 есебімен жеңді. Осылайша, Рыбакина алғашқы екі кездесуде қарсыластарына бірде-бір сет берген жоқ.
2026 жылғы US Open турнирінің жүлде қоры 37,84 миллион долларды құрайды. Бұл қазіргі бағаммен шамамен 17,25 миллиард теңгеге тең.
Жекелей сында чемпион атанған теннисші 5,5 миллион доллар, яғни шамамен 2,51 миллиард теңге алады. Бұған қоса турнир жеңімпазына 2000 рейтингтік ұпай беріледі.
Рыбакина US Open турнирінде екінші нөмірмен тіркелген және жарыстың басты фавориттерінің бірі саналады. Енді әрбір келесі жеңіс оның жүлде ақшасын да, рейтингтік ұпайын да арттыра түседі.
