locale KZ
KZ - Қазақ RU - русский

Қазақстанда Елена Рыбакинаға 2026 жылғы жетістіктері үшін қандай сыйақы берілетіні белгілі болды

Тарихи маусымнан кейін Рыбакинаға ақшалай сыйақы төленеді
Теннис
Қазақстанда Елена Рыбакинаға 2026 жылғы жетістіктері үшін қандай сыйақы берілетіні белгілі болды
ФОТО: Getty images

Қазақстан Республикасының Туризм және спорт министрі Ербол Мырзабосынов әлемнің бірінші ракеткасы Елена Рыбакинаның мансабындағы ең табысты маусымынан кейін қалай марапатталатынын айтты. Министрдің сөзінше, теннисшіге Қазақстан теннис федерациясы бюджеттен тыс қаражат есебінен ақшалай сыйақы береді, деп хабарлайды Sports24.kz.

Бұл мәселе 19 қарашада Орталық коммуникациялар қызметінде өткен брифингте көтерілді. Журналистер Қазақстан тарихында алғаш рет маусымды Әйелдер теннисі қауымдастығының (WTA) рейтингінде бірінші орынмен аяқтаған спортшыға арнайы сыйақы немесе мемлекеттік марапат қарастырылғанын сұрады.

Ербол Мырзабосыновтың айтуынша, Қазақстан теннис федерациясында халықаралық жарыстардағы жетістіктері үшін спортшыларды қаржылай ынталандырудың өзіндік жүйесі қалыптасқан. Федерация басшылығы әртүрлі деңгейдегі турнирлерде көрсетілген нәтижелерге қарай берілетін сыйақы мөлшерін айқындайтын тәртіп әзірлеген.

Осылайша Рыбакинаға төленетін қаражат мемлекеттік бюджеттен бөлінбейді. Дегенмен министр сыйақының нақты көлемін атаған жоқ. Сондай-ақ теннисшіге бөлек мемлекеттік сыйлықақы тағайындалатыны жөнінде әзірге ресми ақпарат берілмеді.

Елена Рыбакина үшін 2026 жыл ерекше жетістіктерге толы болды. Ол маусымды Australian Open турниріндегі жеңіспен бастап, 2022 жылғы Уимблдоннан кейін мансабындағы екінші «Үлкен дулыға» атағын жеңіп алды.

Көктемде қазақстандық теннисші Штутгарттағы топырақ кортта өткен жарыста топ жарды. Ал күзде тағы бір ірі табысқа қол жеткізді. АҚШ ашық чемпионатында қарсыластарынан басым түскен Рыбакина үшінші мәрте «Үлкен дулыға» турнирінің жеңімпазы атанды. Осы жетістіктен кейін ол алғаш рет WTA рейтингінің көшін бастады.

Еленаның жеңісті жолы мұнымен тоқтаған жоқ. Қазан айында Қытайдың Нинбо қаласында өткен турнирде былтырғы чемпиондық атағын сәтті қорғап, бір маусымда жеңіп алған жүлделерінің санын төртке жеткізді.

ФОТО: Getty images

Қазақстандық спортшының тағы бір тарихи жетістігі – жыл соңындағы әлемдік рейтингтің бірінші орнын мерзімінен бұрын қамтамасыз етуі. 29 қазанда Токиодағы турнирде отандасы Юлия Путинцеваны жеңген Елена қалған жарыстардың нәтижесіне қарамастан, маусымды әлемнің үздік теннисшісі ретінде аяқтайтынына кепілдік алды.

Бұған дейін Қазақстан атынан өнер көрсеткен бірде-бір теннисші жыл қорытындысында әлемдік рейтингтің көшбасшысы атанбаған еді.

WTA мәліметінше, Рыбакина 2026 жылы жекелей сында 68 кездесу өткізіп, оның 54-інде жеңіске жетті. Қалған 14 матчта қарсыластарына есе жіберді. Маусым барысында жарыстардан тапқан жүлдеақысы 11 134 420 АҚШ долларына жетті. Бұл – теннисшінің турнирлердегі нәтижелері үшін алған табысы және министр айтқан қосымша сыйақыға қатысы жоқ.

Дегенмен маусымның аяқталуы Рыбакина үшін оңай болған жоқ. Қарашада ол Индиан-Уэллсте ұйымдастырылған WTA-ның қорытынды турниріне былтырғы жеңімпаз ретінде қатысуы тиіс еді. Алайда вирустық ауруға шалдығуына байланысты жарыстан бас тартуға мәжбүр болды.

Соған қарамастан Елена әлемдік рейтингтегі бірінші орнын сақтап қалды. Осылайша 2026 жыл оған екі «Үлкен дулыға» атағын ғана емес, Қазақстан теннисінің тарихында бұрын-соңды болмаған жетістікті де сыйлады.

Аружан Темірбек
Редактор ru, kk
Sports24.kz 163 мың жазылушы
Басты жаңалықтардан хабардар болыңыз! Жаңалықтар, нәтижелер және спорттағы ең жарқын сәттер. Жазылып, маңызды оқиғалардан хабардар болыңыз!
Пікірлер
Пікір қалдыру үшін тіркелуіңіз керек
Для сіздің ыңғайлылығыңыз бен қауіпсіздігіңіз үшін біз файлдар cookie