Алматы алғаш рет World Tennis Бас ассамблеясын қабылдайды
10-13 қазан аралығында Алматыда алғаш рет Орталық Азияда өтетін World Tennis ұйымының жыл сайынғы Бас ассамблеясы ұйымдастырылады, деп хабарлайды Sports24.kz.
Іс-шараға ұлттық федерациялардың, халықаралық және құрлықтық теннис ұйымдарының басшылары мен өкілдері, сарапшылар және саланың серіктестері қатысады.
10 және 11 қазанда World Tennis Директорлар кеңесінің отырыстары өтеді. Ал 11-13 қазан аралығында панельдік отырыстар мен жалпы дауыс беру ұйымдастырылады. Оған әлемнің 137 елінен 262-ден астам делегаттың қатысуы күтіледі.
Бас ассамблеяның Алматыда өткізілуі халықаралық теннис қауымдастығының Қазақстанға деген жоғары сенімін көрсетеді. Сонымен қатар бұл Қазақстан теннис федерациясының беделі артып келе жатқанын білдіреді. Федерацияны World Tennis ұйымының вице-президенті Булат Өтемұратов басқарады.
Алматы үшін ауқымды форумды өткізу 137 елдің өкілдеріне қаланың спорттық инфрақұрылымы мен теннис дәстүрлерін таныстыруға мүмкіндік береді. Бұдан бөлек, қатысушылар тәжірибе алмасып, келіссөздер жүргізіп, жаңа халықаралық серіктестіктерді дамыту мәселелерін талқылай алады.
Бағдарламаның басты оқиғасы 13 қазанда өтетін World Tennis Бас ассамблеясының отырысы болады. Жиын барысында әлемдік теннистің одан әрі даму бағыттарын айқындайтын маңызды шешімдер қабылданады.
Ассамблея аясында теннистің қолжетімділігін арттыру, балалар мен жасөспірімдер теннисін дамыту, спорттық инфрақұрылымды жетілдіру, жаттықтырушылар мен төрешілерді даярлау, сондай-ақ халықаралық жарыстар өткізу мәселелері талқыланады.
Ұлттық федерацияларды қолдауға және халықаралық ынтымақтастықты нығайтуға да ерекше көңіл бөлінеді. Делегаттар атқарылған жұмыстардың қорытындысын шығарып, стратегиялық бастамаларды талқылайды және әртүрлі елдер мен аймақтардағы теннисті дамытуға әсер ететін басым бағыттарды анықтайды.
