Ризабек Айтмұхан Астана-2026 әлем чемпионатынан кейін ота жасатты
Қазақстандық еркін күрес шебері Ризабек Айтмұхан Астанада өткен 2026 жылғы әлем чемпионатындағы өнерінен кейін тізе буынына ота жасатты, деп хабарлайды Sports24.kz.
Балуан алған жарақаттың мән-жайын спортшыға ота жасаған ресейлік хирург Ондар Артыш айтып берді. Оның сөзінше, Айтмұхан әлем чемпионатындағы алғашқы белдесуі кезінде-ақ тізесінің ауырғанын сезген.
«Бүгін біз Ризабекке ота жасаймыз. Ол алғашқы белдесуінің өзінде күрес барысында тізе буынынан ауырсыну сезінді. МРТ нәтижесін қарап шықтық, ота жасауға көрсетілім бар. Көмек сұрады. Біраздан кейін операциялық бөлмеде боламыз», - деді дәрігер.
Медициналық мекеменің әлеуметтік желідегі парақшасында қазақстандық балуанның хирургиялық араласуға дейінгі жағдайы мен ота барысы көрсетілген видео жарияланды.
Еске салайық, отандық әлем чемпионатында Айтмұхан 97 келіге дейінгі салмақ дәрежесінде өнер көрсетті. Алғашқы белдесуінде ол Ресейдің екі дүркін Олимпиада чемпионы Абдулрашид Садулаевпен кездесіп, 1:4 есебімен жеңілді.
Осыдан кейін қазақстандық балуан тізесіне қатысты мәселеге байланысты жарысты жалғастыра алмады. Нәтижесінде ол 11-орынға ие болды.
Сонымен қатар, Садулаев кейін ширек финалда америкалық Кайл Снайдерден жеңілгендіктен, Айтмұхан жұбаныш белдесулері арқылы қола жүлде үшін күресу мүмкіндігінен айырылды.
Ризабек Айтмұханның қалпына келу және бозкілемге оралу мерзімі әзірге хабарланған жоқ.
