«Мен мінсіз боламын»: Софья Самоделкина Канададағы Гран-при кезеңіндегі өнері туралы пікір білдірді
Қазақстандық мәнерлеп сырғанаушы Софья Самоделкина өнер көрсету қорытындысын шығарып, жаттықтырушысы Рафаэль Арутюнянмен жұмыс барысы және келесі турнир — Skate America-ға дайындығы туралы айтып берді, деп хабарлайды Sports24.kz.
Спортшы еркін бағдарлама үшін 135,05 ұпай жинады, ал жалпы нәтижесі 206,89 ұпайды құрады.
Самоделкина екі бағдарламаны да қалай орындағанына көңілі толғанын айтты. Алайда өнер көрсету алдында күтпеген қиындықтарға тап болған.
«Өзімді жақсы сезініп тұрмын, өйткені екі бағдарламамды да көрсете алдым және олар іс жүзінде таза орындалды. Мұны жүзеге асырғаныма өте қуаныштымын. Себебі бүгінгі алғашқы жаттығуым өте нашар өтті. Менің басымда мұндай жағдай бұрын-соңды болған емес. Мүлде қобалжыған жоқпын, сабырлы болдым, бірақ аяқтарым мен денемде не болып жатқанын түсінбедім. Қонақүйден шығуыма екі сағат қалған еді, мен осыны үнемі ойладым. Бірақ жаттығуда еркін бағдарламаны талай рет орындағанмын және оны мұнда да көрсете алатынымды түсіндім. Ақырында солай болды», — деді мәнерлеп сырғанаушы.
Сонымен қатар спортшы дайындығындағы ілгерілеуді ескере отырып, бұдан да жоғары бағалар күтетінін мойындады.
«Әрине, көңілім аздап қалды, өйткені мен әрдайым барымды көрсетуге тырысамын. Ұпайларымның өткен маусымдағыдан жоғары болғаны жақсы, бірақ көп тұста ілгерілегеніме шын сенемін. Өзімді қазірдің өзінде мінсізбін деп отырған жоқпын. Мен мінсіз боламын. Бірақ қазір кейбір элементтерімді жақсарттым деп ойлаймын, ал бағалар керісінше көрсетіп тұр. Сондықтан жұмысымызды жалғастырамыз», — деді Самоделкина.
Мәнерлеп сырғанаушы америкалық маман Рафаэль Арутюнянмен ынтымақтастығы туралы да айтып өтті. Оның сөзінше, жаттықтырушы барлық ұсақ-түйекке мұқият назар аударып, үнемі жетілуге талап етеді.
«Онымен жұмыс істеген маған өте ұнайды. Ол бәрін байқап, қай тұста нашар орындап жатқанымды ашық айтады. Сонда мен мұны тағы жүз рет қайталауым керектігін түсінемін. Кейде ол қандай да бір элементті жақсырақ орындай бастағанымды атап өтеді, бірақ мінсіз орындау үшін әлі де көп жұмыс істеуім керектігін бірден қосады. Кейде ол маған риза, кейде риза емес. Кейде жеткілікті жаттықпай жүргенімді айтады. Ондай жағдайда көбірек жұмыс істеймін», — деді мәнерлеп сырғанаушы.
Самоделкина мәнерлеп сырғанаудың барлық компоненттерін — секірулер мен айналулардан бастап, қадамдар тізбегі мен сырғанау шеберлігіне дейін — жетілдіруге ниетті екенін атап өтті. Бұл бағытта ол Арутюнянмен қатар хореограф Ше-Линн Бурнмен де жұмыс істейді.
«Маған бәрін жақсарту керек дер едім: секірулерді, айналуларды, қадамдар тізбегін және тіпті сырғанау шеберлігін. Біз күн сайын сырғанау техникасы бойынша сабақ өткіземіз. Бұл компонентте тіпті секірулерге қарағанда көбірек ілгеріледім деп ойлаймын. Бір күні өте жоғары бағалар аламын деп үміттенемін. Бірақ ол үшін бағдарламаларды қателіксіз, тіпті ұпайдың болмашы шегерімінсіз мінсіз орындауым керек», — деді спортшы.
Сөз соңында Самоделкина Skate America жарысына дайындық жоспары туралы айтты. Оның сөзінше, қалпына келуге және демалуға іс жүзінде уақыт қалмайды: ол алдағы сегіз-тоғыз күнді барынша тиімді пайдаланғысы келеді.
«Ертең Калифорнияға қайтып, бірден Рафаэльмен, Ше-Линн Бурнмен және бүкіл командамен жұмысқа кірісеміз. Skate America жарысында бұдан да жақсы формада болып, бағдарламаларды сапалырақ орындап, бәлкім, жаңа бір дүниені көрсетемін деп үміттенемін», — деп қорытындылады мәнерлеп сырғанаушы.
Еске салайық, Skate Canada қорытындысы бойынша Софья Самоделкина екі бағдарламадан кейін 206.89 ұпаймен бесінші орын алды. Жапониялық Мао Симада жеңімпаз атанды — екі бағдарламаның нәтижесінде 235.44 ұпай жинады. Екінші орында Эстония өкілі Нина Пинтари болды — 221.07 ұпай. Қола жүлдені америкалық Изабо Левито иеленді — 212.22 ұпай.
