«Ол өте мықты қарсылас»: Кайл Снайдер Астанадағы 2026 жылғы әлем чемпионатынан кейін Ризабек Айтмұханды бағалады
Америкалық еркін күрес балуаны, Олимпиада чемпионы Кайл Снайдер Sports24.kz сайтына берген сұхбатында Астанада өткен 2026 жылғы әлем чемпионатына қатысқан қазақстандық Ризабек Айтмұхан туралы пікірін білдірді.
30 жастағы спортшы қазақстандық балуанның деңгейін жоғары бағалап, оның алдағы жылдары ең ірі халықаралық турнирлерде жүлде үшін күресін жалғастыратынына сенім білдірді.
«Ризабек — өте қиын қарсылас, нағыз чемпион. Бұл әлем чемпионатында ол алғашқы айналымның өзінде Абдулрашид Садулаевпен күресуге мәжбүр болды, сондықтан жеребе ол үшін өте ауыр түсті.
Алайда мен оның осы салмақ дәрежесіндегі ең мықты қарсыластардың бірі болатынын күттім. Ол әлі өте жас, сондықтан оны бозкілемде әлі талай жыл көретінімізге сенімдімін. Біз бұған дейін бірнеше тамаша белдесу өткіздік, болашақта әлі талай рет кездесеміз деп ойлаймын», — деді Снайдер.
Еске салайық, 29 қазанда Ризабек Айтмұхан өз алаңында өткен әлем чемпионатындағы алғашқы белдесуін екі дүркін Олимпиада чемпионы Абдулрашид Садулаевқа қарсы өткізді. 97 келіге дейінгі салмақ дәрежесіндегі кездесу ресейлік балуанның 4:1 есебімен жеңісімен аяқталды.
Кейін Садулаев ширек финалда Кайл Снайдерден жеңіліп қалды. Белдесу 4:4 есебімен аяқталғанымен, қосымша көрсеткіштер бойынша жеңіс америкалық балуанға берілді. Садулаев финалға шықпағандықтан, Айтмұхан жұбаныш белдесулері арқылы жарысты жалғастыру мүмкіндігінен айырылды.
