«Күштірек болып оралуға уәде беремін»: Шайдоров Франция Гран-приіндегі сәтсіздіктен кейін мәлімдеме жасады
Қазақстандық мәнерлеп сырғанаушы Михаил Шайдоров Францияның Анже қаласында өткен 2026/27 жылғы ISU Гран-при сериясының алғашқы кезеңіндегі сәтсіз өнеріне пікір білдірді, деп хабарлайды Sports24.kz.
2026 жылғы Олимпиада чемпионы қысқа және еркін бағдарламаларда бірнеше қателік жіберіп, жарыста жүлде үшін күресе алмады.
Екі бағдарламаның қорытындысы бойынша Қазақстан өкілі 206,55 ұпай жинап, оныншы орынға ие болды.
Турнир аяқталғаннан кейін Шайдоров Instagram-дағы парақшасында жанкүйерлеріне үн қатып, қиын сәтте көрсеткен қолдауы үшін алғыс айтты.
«Мұндай бастамадан кейін сөз табу қиын. Кейде бәрі біз қалағандай бола бермейді. Мұз тайғақ. Сіздердің алаңдаушылықтарыңызды көріп, хабарламаларыңызды оқып отырмын және әрқайсыңызға қолдау көрсеткендеріңіз үшін шын жүректен ризамын. Жеңістерімді ғана емес, жеңілістерімді де менімен бірге бөліскендеріңізге рақмет, өйткені олар да осы жолдың бір бөлігі. Берілмей, күштірек болып оралуға уәде беремін. Баршаңызға рақмет!» — деп жазды қазақстандық мәнерлеп сырғанаушы.
Айта кетейік, қысқа бағдарламадан кейін Шайдоров 80,25 ұпай жинап, төртінші орында тұрған еді. Алайда еркін бағдарлама кезіндегі қателіктер қорытынды хаттамадағы жағдайын жақсартуға мүмкіндік бермеді.
Франция Гран-при кезеңінің жеңімпазы 284,24 ұпай жинаған жарыс қожайыны Адам Сяо Хим Фа атанды. Екінші орынды жапониялық Као Миура (247,96) иеленсе, жүлдегерлер үштігін оңтүстіккореялық мәнерлеп сырғанаушы Со Мин Гю (244,90) түйіндеді.
Шайдоров үшін келесі жарыс Қытайдың Шэньчжэнь қаласында 6-8 қараша аралығында өтетін Гран-при кезеңі болады.
