Ламин Ямаль «Алтын доп» – 2026 рәсімінде тарихи рекорд орнатты
«Барселона» мен Испания құрамасының шабуылшысы Ламин Ямаль тағы да әлемнің үздік жас футболшысы атанды. 19 жастағы испаниялық ойыншы 26 қазанда Лондонда өткен «Алтын доп» – 2026 марапаттау рәсімінде Копа жүлдесін иеленді, деп хабарлайды Sports24.kz.
Бұл – Ямальдың қатарынан үшінші жеңісі. Бұған дейін ол 2024 және 2025 жылдары осы марапатқа ие болған еді. Ал биыл тағы да топ жарып, Копа жүлдесін үш рет жеңіп алған тарихтағы алғашқы футболшы атанды.
Беделді марапат үшін таласта испаниялық ойыншы Еуропа футболының бірқатар жас жұлдызын басып озды. Олардың қатарында «Барселонадағы» командаласы Пау Кубарси, ПСЖ жартылай қорғаушысы Уоррен Заир-Эмери, «Бавария» футболшысы Леннарт Карл және шабуылшы Ян Диоманде болды.
Өткен маусым да Ямаль үшін табысты өтті. Ол «Барселонамен» бірге Испания чемпионаты мен ел Суперкубогын жеңіп алды. Сондай-ақ ұлттық құрама сапында 2026 жылғы әлем чемпионы атанды.
Бір қызығы, марапатты алғаннан кейін Ямаль командаласы Пау Кубарсидің де еңбегін ерекше атап өтті. Футболшының айтуынша, биыл Копа жүлдесі маусымды жоғары деңгейде өткізген Кубарсиге бұйырса да, қуанар еді.
Копа жүлдесі 21 жасқа дейінгі әлемнің үздік футболшысына табысталады. Бұл марапат 2018 жылы тағайындалып, оның алғашқы иегері Килиан Мбаппе атанған. Жеңімпазды бұған дейін «Алтын допты» иеленген футболшылар анықтайды.
Айта кетейік, Ямаль биылғы басты жеке марапат – «Алтын допқа» да үміткерлер қатарында. Өткен жылы испаниялық футболшы дауыс беру қорытындысы бойынша Усман Дембеледен кейін екінші орын алған болатын.
