Елдос Сметов Азия ойындарының финалында жапон спортшысына есе жіберді
Қазақстандық Олимпиада чемпионы Елдос Сметов дзюдодан 2026 жылғы Азия ойындарының күміс жүлдегері атанды, деп хабарлайды Sports24.kz.
60 келіге дейінгі салмақ дәрежесінің финалында қазақстандық дзюдошы Жапония өкілі Хаято Кондомен кездесті.
Белдесу өзіне бөлінген уақыттың соңына дейін созылды. Кондо екі рет нәтижелі әдіс орындаса, Сметов нәтижелі әрекеттерімен жауап бере алмады.
Нәтижесінде жапониялық дзюдошы 2:0 есебімен жеңіске жетіп, Сметов күміс медаль иеленді.
Бұл — Сметовтың Азия ойындарындағы алғашқы медалі емес. 2014 жылы Инчхонда өткен жарыста қазақстандық спортшы жеңімпаз атанған.
Сметовтың күмісі Қазақстан құрамасының 2026 жылғы Азия ойындарындағы 55-медалі болды. Қазір команданың қоржынында тоғыз алтын, 16 күміс және 30 қола жүлде бар.
Елдос Сметов — Париж Олимпиадасының чемпионы
Сметов — дзюдодан Қазақстанның тұңғыш Олимпиада чемпионы. Оның еншісінде қатарынан өткен үш Олимпиада ойындарының медалі бар: 2016 жылғы Рио-де-Жанейро Олимпиадасының күмісі, 2020 жылғы Токио Олимпиадасының қоласы және Париж-2024 ойындарының алтыны.
Париж Олимпиадасындағы триумфынан кейін Сметов жарыстарға қатысуды уақытша тоқтатты. Осы кезеңде ол ағылшын тілін үйреніп, жарақатына байланысты бірнеше операциядан өтті.
Бұған дейін дзюдодан 2026 жылғы Азия ойындарының күміс медалін қазақстандық Абиба Әбужақынова да жеңіп алған болатын. Ол финалда жапониялық Мицуки Кондоға есе жіберді.
