Елдос Сметов Азия ойындарындағы күмістен кейін беделді турнирде өнер көрсетеді
Олимпиада чемпионы Елдос Сметов 29-31 қазан аралығында Абу-Дабиде өтетін дзюдодан «Үлкен дулыға» турнирінің кезеңіне қатысатын Қазақстан құрамасының сапына енді, деп хабарлайды Sports24.kz
Қазақстандық дзюдошы төртінші Олимпиадаға қатысу мүмкіндігін сақтап қалу үшін әлемдік рейтингтегі орнын жақсартуы қажет.
Қазақстан атынан барлығы жеті дзюдошы өнер көрсетеді:
- 60 кг-ға дейін — Елдос Сметов, Талғат Орынбасар;
- 66 кг-ға дейін — Ғұсман Қырғызбаев, Ақылжан Жұбатканов;
- 81 кг-ға дейін — Жалғас Қайролла;
- 90 кг-ға дейін — Айдар Арапов;
- 100 кг-ға дейін — Марат Байкамуров.
Турнирге қатысушылардың басым бөлігі жуырда Айти мен Нагояда өткен 2026 жылғы Азия ойындарында өнер көрсетті. Сметов жеке сайыста күміс медаль иеленсе, Қырғызбаев, Арапов және Байкамуров командалық жарыста күміс жүлдегер атанды.
Ал Азия ойындарының жеке сайысында Қырғызбаев бесінші орын алды, Арапов 1/16 финалда жарыстан шығып қалды, ал Байкамуров қола медаль үшін белдесуде жеңіліп қалды.
34 жастағы Елдос Сметов — Қазақстан тарихындағы ең атақты дзюдошы. Ол үш Олимпиада ойындарында медаль жеңіп алды: Рио-2016 күмісі, Токио-2020 қоласы және Париж-2024 алтыны. Сонымен қатар Сметовтың қоржынында әлем чемпионы атағы мен 2014 жылғы Азия ойындарының алтыны бар.
