Астанадағы әлем чемпионатының алтыны үшін Қайл Снайдердің белдесуі. Онлайн көру
30 қазанда Астанада өтіп жатқан күрес түрлерінен әлем чемпионатында 97 келіге дейінгі салмақ дәрежесінің финалдық белдесуі өтеді. Алтын медаль үшін америкалық Қайл Снайдер мен Жапония өкілі Араш Йошида күреседі, деп хабарлайды Sports24.kz.
Бұл салмақ дәрежесіндегі финалдар Қазақстан уақытымен 18:00-де басталады.
Трансляцияны «Qazsport» телеарнасынан көруге болады.
Қайл Снайдер әлем чемпионатының финалына қалай жетті?
Америкалық балуан әлем чемпионатындағы жолын Түркия өкілі Алперен Токгозды сенімді жеңуден бастады. Снайдер қарсыласына еш мүмкіндік бермей, белдесуді 10:0 есебімен мерзімінен бұрын аяқтады.
Ширек финалда оны турнирдегі ең тартысты қарсыластардың бірі күтіп тұрды. Оның қарсыласы екі дүркін Олимпиада чемпионы Абдулрашид Садулаев болды.
Белдесу өте тартысты өтті. Екінші кезеңде Садулаев 4:1 есебімен алға шыққанымен, Снайдер берілмей, айырманы қысқартты. Америкалық нәтижелі шабуыл жасап, кейін тағы бір ұпай алып, есепті 4:4-ке теңестірді.
Соңғы нәтижелі әрекетті Снайдер жасағандықтан, қосымша критерий бойынша жеңіс соған берілді. Осылайша америкалық балуан мансабындағы басты қарсыластарының бірін тағы да жеңді. Балуандар арасындағы жеке кездесулер есебі Садулаевтың пайдасына 3:2 болды.
Жартылай финалда Снайдер Польша өкілі Збигнев Барановскиймен кездесті. Америкалық белдесу барысын бақылауда ұстап, 5:0 есебімен сенімді жеңіске жетті.
