Астанадағы «Болашақ ойындары 2026» қаралымдар бойынша рекордтарды жаңартуда
Астанада өтетін «Болашақ ойындары 2026» көрермен қызығушылығының рекордтық өсуін көрсетуде, деп хабарлайды Sports24.kz.
Қазақстан Республикасы Туризм және спорт министрлігінің баспасөз қызметінің хабарлауынша, кеше ғана турнир трансляцияларының жалпы қаралымы 85 миллион болса, бүгін бұл көрсеткіш 185 миллионға жетті. Бір тәулікте аудитория 100 миллион қаралымға артқан, бұл жарыстарға халықаралық деңгейде жоғары қызығушылық барын дәлелдейді.
«Мұндай динамика Қазақстанның спорт, технология және инновацияны біріктіретін ірі халықаралық турнирлерді жоғары деңгейде өткізе алатынын дәлелдейді. Қазақстан Республикасы Президенті Қасым-Жомарт Тоқаевтың бастамасымен 2026 жыл Жасанды интеллект жылы деп жарияланды, ал «Болашақ ойындарын» өткізу елдің технологиялық дамуға бағытталған стратегиялық бағытына толық сай келеді», – делінген хабарламада.
Бүгінде киберспорт жастар арасында аса танымал. Біздің мақсатымыз – цифрлық дисциплиналар мен дәстүрлі спорт түрлері бір-біріне қарсы қойылмай, керісінше, бірін-бірі толықтырып, жас буынды белсенді өмір салтына тартуға ықпал ететінін көрсету.
«Болашақ ойындары» – бұл ауқымды жарыс қана емес, сонымен қатар халықаралық ынтымақтастықты нығайтудың, тәжірибе алмасудың және Қазақстанды заманауи спорт, инновация және жаңа технологиялар орталығы ретінде алға жылжытудың маңызды алаңы.
