«Жер жұтса, кіріп кетуге дайын болдым»: Тоқтар сот процесі туралы айтты
Қазақстандық культтік ММА файтері әрі актер Еркебұлан Тоқтар өзіне ұсақ бұзақылық жасағаны үшін әкімшілік жауапкершілікке тартылған сот процесі туралы айтып берді, деп хабарлайды Sports24.kz.
«Сот басталды, ал судья жасы үлкен әйел адам екен. Біздің үйде үлкен әпкеміз бар, біз одан қорқамыз әрі құрметтейміз. Мен де өзімді әпкемді көргендей сезіндім. Қысқасы, ол маған видеоны көрсетіп: „Не дейсіз?“ — деді. Жер жұтса, кіріп кетуге дайын болдым, қатты ұялдым. Тіпті 20 тәулікке, 15 тәулікке қамалсам да, онда айналысатын бірдеңе табар едім деп ойладым. Айыппұл емес, ұяттың өзі мені жеп қойды.
Өз әпкемді көргендей болдым, дәл алдымда тұрғандай сезіндім. „Мені әпкем, әкем мен анам көріп отыр ғой“, — деп ойладым. Сол кезде жауапкершілікті сезіндім. Мені қанша адам қарап, бақылап отырғанын айтудың өзі артық. Заң алдында не жауап берерімді білмей, қысқасы: „Кінәмді мойындаймын, жазаны қолданыңыздар, бірақ бұл енді қайталанбайды“, — дедім. Оған да өз әпкеме айтатындай етіп сөйледім», — деп Тоқтардың сөзін Sports.kz келтіреді.
Бұған дейін файтердің қоғамдық орында балағат сөз қолданғаны үшін айыппұл арқалағаны белгілі болған еді. Алматы қаласының мамандандырылған ауданаралық әкімшілік соты (МАӘС) оны ҚР ӘҚБтК-нің 434-бабы бойынша көпшілік алдында балағат сөз қолданғаны үшін кінәлі деп таныды.
Оқиға Астанада IBA Nomad халықаралық турнирінен кейін бірден болған. Токтар аталған жарыста Бобиржон «Испанчик» Исроиловты нокаутпен жеңіп, жарқын жеңіске жеткен еді. Еркебұлан жекпе-жегінен кейінгі баспасөз конференциясында өзбекстандық файтер Огабек Абдумуминовпен сөзге келіп қалып, оған балағат сөздер айтқан.
