«Жекпе-жек өткіземіз»: Асу Алмабаев Петр Янмен ықтимал жекпе-жек туралы айтты
UFC-дің ең жеңіл салмақтағы қазақстандық жауынгері Асу Алмабаев промоушеннің аса жеңіл салмақтағы чемпионы Петр Янмен ықтимал жекпе-жек туралы пікір білдірді, деп хабарлайды Sports24.kz.
Oilau арнасына берген сұхбатында 32 жастағы спортшыдан Петр Ян оны жекпе-жекке шақырса, не деп жауап беретіні сұралды.
«Шақырса – шақырады. Егер біреу сенен жасы кіші немесе үлкен болса да, жекпе-жекке шақырса, одан қалай бас тартасың? Біз “жоқ” деп айта алмаймыз. Біздің менталитетімізде ондай жоқ. Тіпті біреуден қорқып тұрсаң да, “жоқ” деп айта алмайсың. Ішіңнен қорқып тұрсаң да, “иә” дейсің. Ал нәтижесін жекпе-жек барысында көреміз», – деді спортшы.
Асу Алмабаев 2017 жылдан бері таныс Петр Янды ашық әрі қарапайым адам ретінде сипаттады. Қазақстандық спортшы ресейліктің чемпиондық мәртебесі мен белбеуі оның адамдық қасиеттерін өзгертпегенін атап өтті.
33 жастағы Петр Ян кәсіби мансабында 25 жекпе-жек өткізіп, 20 жеңіс пен бес жеңіліске қол жеткізді. Соңғы жекпе-жегінде ресейлік UFC-дің ең жеңіл салмақтағы чемпионы атағы үшін грузиялық Мераб Двалишвилимен кездесті. Бес раундтың қорытындысы бойынша төрешілер бірауыздан Янға жеңіс берді. Олардың реваншы 24 қазанда өтеді.
Алмабаев UFC-дегі соңғы жекпе-жегін 27 маусымда Бакуде америкалық Чарльз Джонсонға қарсы өткізді. Қазақстандық спортшы жекпе-жекті мерзімінен бұрын аяқтап, үшінші раундта аяққа жасалған ауырту әдісімен жеңіске жетті. Осылайша ол кәсіби рекордын 24 жеңіс және үш жеңіліске жеткізді. Қазақстандық жауынгердің келесі қарсыласы жапониялық Кёдзи Хоригути болады. Жекпе-жек 21 қарашада Катарда өтетін UFC турнирінде жоспарланған.
