«Барыс» «Автомобилистпен» матч алдындағы жоғалтуларын хабарлады
Сәрсенбі, 14 қазанда астаналық «Барыс» Құрлықтық хоккей лигасының (ҚХЛ) тұрақты чемпионаты аясында Екатеринбургтің «Автомобилист» командасына қарсы өз алаңындағы матчын өткізеді, алайда елордалық командаға бәрі бірдей көмектесе алмайды, деп хабарлайды Sports24.kz.
Кездесу Қазақстан уақытымен 19:30-да «Барыс Аренада» басталады. Тікелей трансляция Qazsport телеарнасында қолжетімді болады.
«Алдағы матчта «Барысқа» Мади Диханбек көмектесе алмайды. Сондай-ақ ауырып қалған Всеволод Логвиннің ойынға қатысуы да сұрақ астында», - делінген клуб мәлімдемесінде.
«Автомобилист» соңғы матчын 6 қазанда өткізіп, өз айдынында омбылық «Авангардты» 4:0 есебімен ойсырата жеңді. Шайбаларды Кейл Клэг, Александр Шаров, Александр Кадейкин және Джесси Блэкер соқты. Қақпашы Владимир Галкин 22 соққыға тойтарыс берді.
13 матчтан кейін Екатеринбург командасы 14 ұпай жинап, Шығыс конференциясында жетінші орында тұр. Жарақат алғандар тізімінде Галкин мен Никита Шашков бар.
«Барыс» бұл ойынға «Сибирьден» өз алаңында 2:3 есебімен жеңілгеннен кейін келеді. Астаналықтардың құрамында осы маусымдағы алғашқы шайбасын соққан Кирилл Савицкий мен Мэйсон Морелли көзге түсті. Қорғаушы Логан Дэй нәтижелі сериясын алты матчқа дейін созып, чемпионаттағы оныншы нәтижелі пасын берді. Хантер Шепард 27 соққыны қайтарды.
14 кездесуден кейін қазақстандық клубтың еншісінде 16 ұпай және Шығыстағы бесінші орын бар. Команданың және бүкіл чемпионаттың үздік мергені — Джастин Бэйли. Оның қоржынында 10 гол мен жеті нәтижелі пас бар.
