«Қайрат» алаңға шықпай-ақ 5:0 есебімен жеңіске жетіп, Чемпиондар лигасының плей-офф кезеңіне мерзімінен бұрын жолдама алды
Алматылық «Қайрат» УЕФА-ның күтпеген шешімінен кейін 2026/2027 жылғы футзалдан Чемпиондар лигасы маусымының 1/8 финалына мерзімінен бұрын жолдама алды, деп хабарлайды Sports24.kz.
УЕФА-ның бақылау, этика және тәртіп жөніндегі органы румыниялық «Юнайтед Галац» клубына турнирдің негізгі кезеңіндегі матчтарға қатысудан бас тартқаны үшін 0:5 есебімен үш техникалық жеңіліс жазды.
Румыниялық команда қарсыластарының бірі қазақстандық «Қайрат» болуы тиіс еді. Кездесу 29 қазанға жоспарланған болатын, алайда енді бұл матч өтпейді.
УЕФА-ның ресми шешіміне сәйкес, үш матчтың нәтижесі төмендегідей белгіленді:
«Юнайтед Галац» — «Спортинг Андерлехт» — 0:5;
«Юнайтед Галац» — «Қайрат» — 0:5;
«Бейтар» — «Юнайтед Галац» — 5:0.
Осылайша, алматылық клуб матч өткізбей-ақ үш ұпайға ие болды.
«Қайрат» плей-офф кезеңіне шығуға кепілдік алды
УЕФА-ның тәртіптік шешімі негізгі кезеңнің екінші тобынан плей-оффқа өтетін командалардың барлығын іс жүзінде анықтап берді.
Жарыс регламентіне сәйкес, топтағы үздік үш команда 1/8 финалға шығады.
«Юнайтед Галац» жарыстан шеттетілгеннен кейін топта тек үш команда — «Қайрат», бельгиялық «Спортинг Андерлехт» және латвиялық «Бейтар» қалды.
Үш клуб та автоматты түрде турнирдің келесі кезеңіне жолдама алды.
Сонымен қатар топтық кезеңнің қалған кездесулері командалардың қорытынды турнирлік орналасуын анықтау тұрғысынан маңызды болып қала береді.
Еске салайық, «Қайрат» футзалдан Чемпиондар лигасының екі дүркін жеңімпазы атанған. Алматылықтар беделді трофейді 2013 және 2015 жылдары жеңіп алған.
Биылғы жарыста қазақстандық клуб турнирге рекордтық 23-рет қатысып отыр.
Чемпиондар лигасының 1/8 финалының жеребесі 4 қарашада тартылады.
