Ямалдың әкесі «Алтын доп» алдында үлкен жанжал шығарды: полиция араласуға мәжбүр болды
«Барселона» мен Испания құрамасының шабуылшысы Ламин Ямалдың әкесі Мунир Насрауи 2026 жылғы «Алтын доп» марапаттау рәсімі қарсаңында үлкен жанжалдың қатысушысы атанды, деп хабарлайды Sports24.kz.
Испаниялық Crónica Global басылымының мәліметінше, оқиға Барселонадағы Эль-Прат әуежайында болған. Насрауи сол жерден марапаттау рәсіміне қатысу үшін Лондонға ұшпақ болған.
Жанжалға кәдімгі күрте себеп болған. Ер адам оны рұқсат етілмеген жерге қалдырған, кейін дәмхана қызметкері затты алып қоюын сұраған.
Алайда куәгерлердің айтуынша, Насрауи ескертуге агрессивті түрде жауап берген. Оның даяшы әйелмен сөзге келіп қалғаны, жанжал барысында футболшының әкесі әйелдің бетіне түкіргені болжануда.
Жанжал мұнымен аяқталған жоқ.
Келушілердің бірі дәмхана қызметкерін қорғауға тырысқан, алайда өзі де агрессияға тап болған. Дереккөздің мәліметінше, Насрауи ер адамды ұрып, кейін орындықты алып, оны қарсыласына лақтыратынын айтып қорқытқан.
Жағдайды реттеу үшін Испания Азаматтық гвардиясы қызметкерлерінің араласуына тура келді.
Құқық қорғау органдары келгеннен кейін жанжалды тоқтату мүмкін болды. Оқиғаға қарамастан, Насрауиге сапарын жалғастыруға рұқсат беріліп, ол Лондонға кедергісіз ұшып кеткен.
Бір қызығы, «Алтын доп» рәсімі кезінде Ямалдың әкесі қатысқан жалғыз жанжал бұл емес. Кейін ол «Қайраттың» бұрынғы футболшысы Андрей Аршавин қатысқан видеоны түсіріп жатқан операторымен де жанжалдасқан.
Еске салайық, 2026 жылғы «Алтын доп» марапаттау рәсімі 26 қазанда өтті. Басты жеке жүлдені «Бавария» шабуылшысы Гарри Кейн иеленді, ал Ламин Ямаль үшінші рет қатарынан үздік жас футболшыға табысталатын Копа жүлдесінің жеңімпазы атанды.
