Өзбекстан әлем чемпионатындағы алғашқы матчында жеңіліп қалды
2026 жылғы футболдан әлем чемпионатының К тобы аясындағы матч аяқталды: Өзбекстан мен Колумбия құрамалары кездесті — 1:3, деп хабарлайды Sports24.kz.
Мехиконың (Мексика) «Ацтека» стадионында аншлаг болды, ойынды 80 мыңнан астам жанкүйер тамашалады.
Құрамалар тізімі
Өзбекстан: Юсупов, Хусанов, Ашурматов, Насруллаев, Абдуллаев, Каримов, Мозговой, Шукуров, Файзуллаев, Урунов, Шомуродов.
Колумбия: Варгас, Муньос, Лукуми, Санчес, Мохика, Пуэрта, Лерма, Родригес, Арьяс, Диас, Суарес.
Ойын барысы
Бірінші таймның соңына қарай колумбиялықтардың шабуылдары барған сайын қауіпті бола түсті. 40-минутта Луис Диастың тамаша пасынан кейін Даниэль Муньос қақпашымен бетпе-бет шығып, есеп ашты.
Алаңға ауысып шыққан Хамданов Өзбекстан құрамасының голдық шабуылында шешуші рөл атқарды. 60-минутта ол бүйір сызықта допты сақтап, айып алаңына тамаша пас шығарды, нәтижесінде Шомуродов қақпаға қатты соққы жасады.
Колумбиялық қақпашы допты қайтарды, бірақ доп оның үстінен асып түсіп, Файзуллаев бос қақпаға бағыттады — бұл өз елінің әлем чемпионаттарындағы тарихындағы алғашқы гол болды.
Есеп теңескеннен кейін бар болғаны бес минут өтті — 65-минутта Шомуродов орталық алаңда доптан айырылып, колумбиялықтар қауіпті қарымта шабуыл ұйымдастырды. Луис Диастың соққысын қақпашы қайтарды, бірақ доп бәрібір қақпаға кіріп кетті.
Кездесудің соңында командалар қосымша 9 минут ойнады, алайда Өзбекстан таразы басын теңестіре алмады. Есесіне, Колумбия үшінші голды соқты — Кампас айып алаңына көтерілген допты баспен дәл аяқтады.
Матчтың қорытынды есебі — 1:3.
Өзбекстан мен Колумбиядан бөлек, К тобында Португалия мен ДР Конго құрамалары да бақ сынайды.
2026 жылғы әлем чемпионаты АҚШ, Канада және Мексикада 11 маусым мен 19 шілде аралығында өтеді.