Уразбахтин «Елімаймен» болған матч жайлы: Сәттілік жетіспеді, бірақ алға қадам басамыз
18 мамыр күні Қазақстан Премьер-лигасының 9-турындағы орталық кездесу өтті – Семейлік «Елімай» өз алаңы «Спартакта» алматылық «Қайратты» қабылдады.
Тартысты өткен ойында алаң иелері 1:0 есебімен жеңіске жетті.
Ойыннан кейін «Қайраттың» бас бапкері Рафаэль Уразбахтин матчтың нәтижесіне қатысты пікір білдірді:
- «Не айтуға болады? Әрине, өкінішті. Бұл жерден ұпайсыз қайтуды үйренбегенбіз. Футболда мүмкіндіктерді пайдалану маңызды, өкінішке қарай, біз оны орындай алмадық. Матч ашық өтті, екі команда да шабуылда белсенді болды. Меніңше, бұл ойын тең есепке лайық еді, бірақ сәл ғана сәттілік қарсыластың жағында болды. «Елімайды» жеңісімен құттықтаймын. Алда әлі чемпионаттың үлкен бөлігі бар. Жігіттерге алғысым шексіз – ешқайсына ешқандай ренішім жоқ. Біз әрқашан бірге боламыз – жеңгенде де, жеңілгенде де. Иә, бұл жолы жеңілдік, бірақ бәрі енді басталды. Қателіктерден сабақ алып, әрі қарай жұмыс істейміз».
Жеңіліске қарамастан, алматылық клуб турнир кестесінде екінші орнын сақтап қалды, олар тек көшбасшы – «Ақтөбеге» жол беріп тұр. Бұған дейін «Қайрат» Қазақстан кубогының ширек финалында «Ордабасыға» есе жіберіп, жарыстан шығып қалған еді.
Байланысты командалар мен лигалар
