Сәтпаев пен Анарбеков Forbes тізіміне енді
Алматының «Қайрат» клубы мен Қазақстан ұлттық құрамасының футболшылары Дастан Сәтпаев пен Темірлан Анарбеков Forbes Kazakhstan журналының жыл сайынғы «30 жасқа дейінгі 30» жас көшбасшылар тізіміне енді. Бұл рейтингке қазақстандық спорттың өзге де өкілдері кірді, деп хабарлайды Sports24.kz.
Қазақстандық футбол алаңнан тыс тағы бір ірі халықаралық мойындауға қол жеткізді. «Қайрат» пен ұлттық құрама сапында өнер көрсететін Дастан Сәтпаев пен Темірлан Анарбеков Forbes Kazakhstan-ның «30 жасқа дейінгі 30» тізіміне енді.
17 жастағы Дастан Сәтпаев қазақстандық футбол тарихындағы ең жарқын таланттардың бірі саналады. Оның мансабындағы басты оқиға — шабуылшының осы жылдың жазында Лондонның «Челси» клубына ауысуы.
Жас болса да, Сәтпаев «Қайрат» сапында Қазақстан чемпионы атанып, елдің Суперкубогын жеңіп алды және 2025 жылғы маусымның ҚПЛ-дағы үздік футболшысы атанды. Оның қарқынды дамуы халықаралық деңгейде де назардан тыс қалмады.
Goal басылымының NXGN 2026 рейтингінде Сәтпаев әлемнің үздік 50 жас ойыншысының қатарына кіріп, 43-орынға жайғасты. Сонымен қатар, TransferRoom порталының нұсқасы бойынша ол 21 жасқа дейінгі ең келешегі зор футболшылар тізімінде көш бастады.
Сәтпаевтың мансабында ерекше орын алатын сәт — Чемпиондар лигасындағы ойыны. 2025 жылдың күзінде ол «Копенгаген» қақпасына доп соғып, Чемпиондар лигасының топтық кезеңінде гол салған алғашқы қазақстандық атанды.
Бұл гол сонымен қатар оны Чемпиондар лигасы тарихындағы ең жас үшінші гол авторы етті. Сол кезде Сәтпаев небары 17 жас және 106 күн болған. Бұл көрсеткіш бойынша ол тек Ансу Фати мен Ламин Ямалдан ғана қалып қойды.
Бұдан бөлек, Дастан Қазақстан құрамасы тарихындағы ең жас гол авторы болды. Ол Бельгияға қарсы ойында 17 жас 3 ай 3 күнінде мергендігімен көзге түсті.
Forbes тізіміне 22 жастағы Темірлан Анарбеков те енді. «Қайрат» пен Қазақстан құрамасының қақпашысы еуропалық алаңдардағы жарқын ойынының арқасында елдегі ең болашағы зор голкиперлердің бірі атанды.
Анарбеков Чемпиондар лигасында матчтың үздік ойыншысы атағына ие болған алғашқы қазақстандық қақпашы болды. Бұл атақты ол грек «Олимпиакосымен» кездесуде сегіз сейв жасап алған еді.
Чемпиондар лигасының топтық кезеңі қорытындысы бойынша Анарбеков турнирдің үздік үш қақпашысының қатарына енді — ол алты матчта 36 сейв жасады. Сондай-ақ, ол SofaScore жүйесі бойынша орташа 8.17 ұпаймен топтық кезеңнің үздік үш ойыншысының бірі болды.
Сәтпаев пен Анарбековтен бөлек, Forbes Kazakhstan-ның спорттық блогына 15 жастағы Карим Мендиканов (Қазақстаннан «Барселонамен» келісімшартқа отырған алғашқы футболшы), теннисші Александр Бублик және киберспортшы Данил Голубенко енді.
«30 жасқа дейінгі 30» — Forbes журналының жыл сайынғы тізімі, оған ең үмітті жас көшбасшылар, кәсіпкерлер, спортшылар және 30 жасқа дейінгі жаңашылдар енеді. Қатысушылар тек танымалдықпен ғана емес, жетістіктері, ықпалы, әлеуеті мен өз саласына қосқан үлесі бойынша бағаланады. Қазақстан спорты үшін бірнеше бірден жас өкілдің рейтингке кіруі — жаңа буын спортшыларының өсуінің тағы бір дәлелі.
Айта кетейік, жуырда «Қайрат» футбол клубы Дастан Сәтпаевтың алматылықтар сапындағы соңғы матчтары туралы хабарлады.