Армяндардың ең үздігі: КПЛ тарихындағы Армениядан шыққан топ ойыншылар
Бүгін Қазақстан құрамасы Арменияға қарсы жолдастық матч өткізеді. Осы матч қарсаңында Sports24.kz әр кезеңде Қазақстан чемпионатында өнер көрсетіп, КПЛ тарихында айтарлықтай із қалдырған армян азаматтығы бар ойыншыларды еске түсіреді.
Әр жылдары армян азаматтығы бар футболшылар Қазақстан чемпионатында өз ізін қалдырды. Біреулері клубтардың көшбасшысы мен жанкүйерлердің сүйіктісіне айналса, енді біреулері ұлттық құраманың ойыншысы мәртебесімен келіп, өз әлеуетін толықтай көрсете алмады.
Маркос Пиззелли – КПЛ-дегі басты армян қаһарманы
Клубы: «Ақтөбе»
Кезеңдері: 2014-2015, 2018-2019
КПЛ статистикасы: 89 матч, 33 гол
Пиззелли Қазақстанға келгенде Армения құрамасының танымал ойыншысы болатын. Бұған дейін Арменияда ерекше ойнап, жергілікті чемпионаттың үздік сұрмергені атанды, Донецкінің «Металлургінде» және «Краснодарда» өнер көрсетті. 2014 жылы «Ақтөбеге» алғаш рет «Краснодардан» жалға келді, кейін клуб оның трансферлік құқын толықтай сатып алды.
Алғашқы кезеңі өте сәтті өтті: КПЛ-2014 күмісі, КПЛ-2015 қола жүлдесі, Қазақстан Суперкубогы. Бірақ нағыз культ мәртебесіне 2018 жылы қол жеткізді: «Ақтөбеге» қайта оралып, 18 голмен Қазақстан чемпионатының үздік сұрмергені болды.
Маркос трансфері сөзсіз сәтті болды. «Ақтөбе» үшін ол жай ғана легионер емес, нағыз жұлдыз, жанкүйерлердің сүйіктісіне айналды. Қазақстаннан кейін оның мансабы аяқталуға жақындады: 2019 жылдың соңында «Арарат-Армениямен» келісімшартқа отырды, алайда жарақатына байланысты футболмен қоштасты.
Тигран Барсегян – «Қайсардың» көшбасшысы, «Астананың» мықты ойыншысы
Клубтары: «Қайсар», «Астана»
Кезеңдері: 2019-2021
КПЛ статистикасы: 72 матч, 22 гол
Барсегян 2019 жылы Армения мен Македонияда ойнап, «Вардармен» чемпион атанғаннан кейін «Қайсарға» келді. Қызылордада ол тез арада команданың негізгі шабуылшысы болды: чемпионатта 12 гол, сондай-ақ «Қайсар» жеңген 2019 жылғы Қазақстан Кубогында маңызды рөл атқарды.
Осындай маусымнан кейін оны «Астана» өз қатарына қосты. Бұл – КПЛ-дегі топ-клубқа өту еді. Астанада Барсегян «Қайсардағыдай» жарқырай алмаса да, нәтижелі ойын көрсетті: голдар, нәтижелі пастар, қаптал мен финалдық үшінші аймақтағы белсенділік.
Тигран трансферіне баға берсек, әсіресе «Қайсардағы» маусымына байланысты, нағыз табысты болды. Қазақстандық кезеңі оған трамплин қызметін атқарды: «Астанадан» кейін ол Братиславаның «Слован» клубына ауысып, Словакия чемпионы атанып, Чемпиондар лигасының топтық кезеңінде ойнауға мүмкіндік алды.
Камо Оганесян – КПЛ-дегі ең тұрақты армян
Клубтары: «Жетісу», «Қайрат», «Астана»
Кезеңдері: 2018-2023
КПЛ статистикасы: 139 матч, 11 гол
Камо алдымен «Жетісуда» ашыла түсті. Талдықорғанда екі маусымнан кейін оны «Қайрат» өз қатарына шақырды.
«Қайратта» ол Қазақстан чемпионы атанды, кейін «Астанаға» ауысты. Бұл ауысу эмоционалды жағынан да қызық болды: Камо жанкүйерлерге бұрын «Қайратта» ойнағанын ашық айтты, бірақ «Астанаға» өшпенділік немесе дұшпандық сезімі жоқ екенін білдірді.
Ол Пиззелли деңгейіндегі супер жұлдыз болмағанымен, тұрақтылығы, әмбебаптығы мен бірнеше маусымдағы сенімділігі бойынша Камо – КПЛ тарихындағы ең үздік армян легионерлердің бірі. Қазақстаннан кейін Арменияға оралып, мансабын «Арарат-Арменияда» жалғастырды.
Роберт Арзуманян – «Ақтөбемен» чемпион атанған қорғаушы
Клубтары: «Ақтөбе», «Шахтер»
Кезеңдері: 2013-2014, 2016
КПЛ статистикасы: 55 матч, 3 гол
Арзуманян 2013 жылдың ақпанында «Ақтөбеге» Армения құрамасының тәжірибелі қорғаушысы ретінде келді, Дания, Польша және Ресейде де ойнаған. Оның басты артықшылықтары жылдамдығы мен төменде ойнау шеберлігі еді.
Қазақстанда ол бірден чемпион командаға түсті. 2013 жылы «Ақтөбе» Қазақстан чемпионы атанды, ал Арзуманян Еуропа лигасы плей-офф кезеңіне дейін жеткен қорғаныстың бір бөлігі болды. 2014 жылы клубпен бірге Қазақстан Суперкубогын жеңіп алды.
Кейін ол «Амкарға» ауысты, бірақ 2016 жылы аренда арқылы Қарағандының «Шахтеріне» оралды. Бұл кезең аса жарқын болмады: чемпионатта бар болғаны 8 матч өткізді.
Роберт әсіресе «Ақтөбеде» сәтті болды. «Шахтердегі» кезең – қысқа әрі өткінші ғана болды. Осыдан кейін мансабы төмендеп, кейін футболдағы бапкерлік қызметке ауысты.
Вараздат Ароян – мәртебелі қорғаушы
Клубы: «Астана»
Кезеңдері: 2021, 2023
КПЛ статистикасы: 29 матч, 2 гол
Ароян «Астанаға» Армения құрамасының капитаны әрі көшбасшысы, РПЛ-де тәжірибесі бар қорғаушы ретінде келді. Алғашқы кезеңі – 2021 жыл, кейін Испанияның «Кадисіне» және Кипрдің «Анортосисіне» ауысты, 2023 жылы қайта «Астанаға» оралды.
Қазақстандағы мансабы үнемі қысқа кезеңдерге бөлінді. Мәртебесі бойынша өте мықты трансфер болды, бірақ «Астананың» толыққанды аңызына айнала алмады. 2024 жылдың қаңтарында клуб онымен келісімшартты тоқтатты.
Вараздат – сапалы, бірақ аса ерекше емес легионер. Оның есімі Қазақстан чемпионатындағы нақты үлесінен гөрі кеңірек танымал.
Армения – Қазақстан матчы – ұлттық құрамалардың тарихы ғана емес, екі ел арасындағы футбол байланыстары мен Қазақстан чемпионатындағы клуб деңгейіндегі жолдардың тоғысуын еске алуға тамаша себеп.
Айта кетейік, Армения – Қазақстан матчы бүгін, 2026 жылғы 6 маусымда, Қазақстан уақытымен 21:00-де өтеді. Армения – Қазақстан матчының тікелей трансляциясын «Qazsport» телеарнасынан көре аласыздар.