«Мен үшін басымдық — “Ақтөбе”»: Георгий Жуков келісімшартты ұзарту, ҚПЛ клубтарынан түскен ұсыныстар және Нанимен бірге ойнау туралы айтты
Қазақстан құрамасының 31 жастағы жартылай қорғаушысы Георгий Жуков «Ақтөбемен» келісімшартты ұзартуға қатысты пікір білдірді. Футболшы ҚПЛ-дің басқа клубтарынан ұсыныстар болғанын, алайда әу бастан-ақ «қызыл-ақтар» сапында қалуды көздегенін айтты, деп хабарлайды Sports24.kz.
«Ақтөбе» Жуковпен келісімшартты ұзартқанын ресми түрде жариялады. Аяқталған ҚПЛ маусымында жартылай қорғаушы 24 матч өткізді. Футболшының айтуынша, Қазақстанның өзге командалары да қызығушылық танытқанына қарамастан, клуб басшылығымен келіссөздер жылдам аяқталған.
«ҚПЛ-дің басқа клубтары да қызығушылық танытты, бірақ мен үшін басымдық — “Ақтөбе”. Сондықтан клубпен келісімшартты ұзарту жөнінде тез келістік. “Ақтөбе” — Қазақстандағы топ-клуб. Осы команданың бір бөлігі болғанымды мақтан тұтамын», — деді Жуков.
Аяқталған чемпионаттағы команданың өнеріне баға берген Жуков маусымның оңай болмағанын мойындады. Оның айтуынша, турнирдің басында-ақ клуб тап болған кадрлық қиындықтар нәтижеге әсер еткен.
«Меніңше, біз үшін маусым қиын болды. Чемпионат басталғанда құрамымыз толық жасақталмаған еді, оған қоса он шақты футболшымыз жарақат алып қалған. ҚПЛ-дің бірінші айналымы біз үшін өте ауыр өтті», — деді жартылай қорғаушы.
Сонымен бірге Жуков Қазақстан чемпионатындағы бәсекелестік деңгейі оның бұған дейін «Қайрат» пен «Астана» сапында ойнаған кезеңімен салыстырғанда айтарлықтай артқанын атап өтті.
«Меніңше, қазір клубтар арасындағы ойын сапасының айырмашылығы азайды. Лигада бәсеке күшейді», — деді футболшы.
Жартылай қорғаушы португалиялық танымал футболшы Нанимен бірге ойнағаны туралы да пікір білдірді. Жуков «Манчестер Юнайтед» пен Португалия құрамасының бұрынғы ойыншысының кәсіби қасиеттеріне жоғары баға берді.
«Нани — жоғары деңгейдегі ойыншы әрі нағыз кәсіби маман. Онымен бірге ойнағанымызға бәріміз қуаныштымыз», — деді Жуков.
Келісімшартты ұзартқанына қарамастан, жартылай қорғаушы алдағы чемпионатқа арналған нақты жеке мақсаттарын атаған жоқ.
«Өзіме жеке мақсат қоймаймын. Бәрі де Алланың қолында. Қазір демалыстамын, енді оқу-жаттығу жиынына денені біртіндеп дайындау керек. Демалып, бабымды жоғалтпау қажет. Қолдау режимінде жаттығу жасаймын», — деді футболшы.
Еске салайық, Георгий Жуков «Ақтөбеге» ауысқанға дейін Польшаның «Пуща» клубында ойнаған. Бұған дейін футболшы «Астана», «Қайрат», Краковтың «Висласы» және Қытайдың «Цанчжоу Майти Лайонс» командаларында өнер көрсетіп, Нидерландта да ойнаған. Аяқталған Қазақстан Премьер-лигасы маусымында Жуков 24 кездесу өткізді. Чемпионат аяқталған соң «Ақтөбе» футболшымен келісімшартты ұзартқанын ресми түрде жариялады.
