Ники Хайен Чемпионшиптегі кезекті сәтсіздіктен кейін «Бернлидегі» болашағы туралы пікір білдірді
«Бернли» бас бапкері Ники Хайен Англия Чемпионшипіндегі кезекті сәтсіздіктен кейін өзінің болашағы туралы пікір білдірді, деп хабарлайды Sports24.kz.
«Бернли» Дастан Сәтпаевпен бірге Чемпионшиптің 12-туры аясында «Линкольннен» (1:4) ойсырай жеңілді. Осыдан кейін бапкердің қызметтен кетуі мүмкін деген әңгіме қайта өрбіді.
«Бұл ойын және қазіргі жағдайымыз үшін кешірім сұраймын. Бірақ жанкүйерлеріміз үшін мұның қаншалықты маңызды екенін де білемін. Сондықтан олардың қатты ренжігенін толық түсінемін әрі қабылдаймын. Біз әрі қарай да аянбай еңбек ете аламыз, қолымыздан келетіні — осы ғана. Бірақ олардың көңіл күйін толық түсінемін.
Мен қызметімді жалғастыра беремін бе? Білмеймін. Футболда жағдайдың қалай болатынын білемін, мұны жақсы түсінемін. Бірақ өткен жолы да айтқанымдай, энергиямды жоғалтқым келмейді, өйткені бұл — басшылық қабылдайтын шешім.
Әрине, мұндай нәтижелермен жағдайдың қиындай түсетінін түсінемін. Дегенмен күн сайын бар күшімді салып, өте тынымсыз еңбек етемін. Қолымнан келетіні — осы ғана», — деді бапкер матчтан кейін.
Бірінші таймда басымдыққа ие болғанына қарамастан, «Бернли» «Синсил Бэнкте» 1:4 есебімен жеңіліп, Чемпионшиптің ең нашар үш командасының қатарында қалды.
Қазақстандық шабуылшы Дастан Сәтпаев «бордолылардың» негізгі құрамына енгізілді. 18 жастағы форвард алаңда 59 минут өткізіп, нәтижелі әрекетімен көзге түспестен ауыстырылды.
