Германия 2038 жылғы әлем чемпионатын өткізуді көздеп отыр және ФИФА-дан ережелерді өзгертуді сұрайды
Германия футбол одағы (DFB) 2038 жылғы әлем чемпионатын өткізу құқығы үшін күресуге ниетті, деп хабарлайды Sports24.kz.
Алайда бұл жоспарды жүзеге асыру үшін Германияға әлем біріншілігінің иесін анықтаудағы ФИФА-ның құрлықтар ротациясына қатысты қолданыстағы ережелерін айтарлықтай өзгерту қажет болады.
Бұл туралы Германия футбол одағының өкілі Аксель Хеллманн мәлімдеді. Оның айтуынша, Германия турнирді өткізуге толық дайын және барлық қажетті инфрақұрылымға ие, сондықтан жаңа нысандар салуға ауқымды инвестиция қажет емес.
«Бізде әлем чемпионатын өткізуге арналған барлық инфрақұрылым бар. Үлкен қаржы құюдың қажеті жоқ. ФИФА ротация принципіне қатысты икемділік танытады деп үміттенеміз», — деді Хеллманн.
Неміс өтінімі үшін басты кедергі – қазіргі ротация жүйесі болып отыр. Қолданыстағы ережеге сәйкес, 2030 жылы Испания, Португалия және Мароккода (ал алғашқы матчтар Уругвай, Аргентина және Парагвайда) өтетін әлем чемпионатынан, сондай-ақ 2034 жылы Сауд Арабиясында өтетін турнирден кейін, әлем біріншілігінің келесі иесі Солтүстік Америка не Океания елінен болуы тиіс.
Егер ФИФА қазіргі ережелерді сақтаса, Еуропа елдері, соның ішінде Германия да, 2038 жылғы әлем чемпионатын өткізу құқығына үміткер бола алмайды. Сондықтан Германия футбол одағы халықаралық федерациядан ерекше жағдай жасайды немесе иесі анықтау тәртібін қайта қарайды деп үміттенеді.
Германия ірі футбол турнирлерін ұйымдастыруда мол тәжірибеге ие. Ел 1974 және 2006 жылдары әлем чемпионатын, сондай-ақ бірнеше рет Еуропа чемпионатын қабылдаған. DFB өкілдерінің пікірінше, дайын инфрақұрылым, заманауи стадиондар мен дамыған көлік желісі әлем біріншілігін қосымша ірі шығындарсыз өткізуге мүмкіндік береді.
