Видео: Мозес \"Қайсар\" сапындағы алғашқы голын соқты
Лондондық "Челси" клубының бұрынғы шабуылшысы Виктор Мозес "Қайсар" сапында алғашқы голын соқты, деп хабарлайды Sports24.kz.
Нигериялық шабуылшы Қызылордалық ұжымдағы голдарының есігін Қазақстан Кубогының жартылай финалының бірінші матчында "Жеңіске" қарсы ашты. Алдымен төртінші минутта ол Нұралы Жақсылыққа нәтижелі пас берсе, бірінші таймның соңында өзі пенальтиден гол соқты.
Осылайша, Мозеске "Қайсар" сапында алғашқы голын соғу үшін 12 матч қажет болды. Бұған дейінгі 11 кездесуде нигериялық футболшы тек екі нәтижелі паспен шектелген еді.
Мозес жарақатына байланысты бір айдан астам уақыт алаңға шықпаған болатын. Ол шілде айының соңында "Елімайға" қарсы чемпионат матчында алаңға 68 минут шыққанымен, есепке әсер ете алған жоқ.
Нигериялық футболшы "Қайсар" сапында 2026 жылдың басынан бері өнер көрсетеді. Оның мансабында "Челси"-ден бөлек, Мәскеудің "Спартагы", "Ливерпуль", "Фенербахче" және "Интер" клубтары да бар.
