Чесноков Ресейге көшуге келіспеді: ҚПЛ-дан екі ұсыныс бар
Қазақстан құрамасының вингері Ислам Чесноков жазғы трансферлік кезеңде «Хартстан» кетуі мүмкін, алайда ол өзіне қызығушылық танытқан лигалардың бірін бірден ысырып тастады, деп хабарлайды Sports24.kz.
Журналист Максим Никитиннің мәліметінше, «джамбос» маусымаралықта фланг ойыншысымен қоштасуға әзір, бірақ ресейлік Премьер-лига клубтарының біріне бару Чесноковтың жоспарында жоқ. Бұған дейін дәл осы бағытты вингер мансабын жалғастыру үшін басымдық ретінде қарастырғаны туралы хабарланған еді.
Оған туған чемпионаттан да қызығушылық бар. Жоғарыда аталған дереккөздің хабарлауынша, Чесноковқа оның бұрынғы клубы «Тобыл» мен «Ордабасы» көз тігіп отыр.
Шотландияға ауысқалы бері Қазақстан құрамасының вингері тек бес рет негізгі құрамда алаңға шығып, жалпы 11 матч өткізіп, бір гол соқты.
Вице-чемпион мәртебесінде «Хартс» Чемпиондар лигасының екінші іріктеу кезеңінен бастайды, мүмкін қарсыластары қатарында — «Фенербахче» мен Австрияның «Штурмы» бар.
