Чесноков Ресейде мансабын жалғастыра ма? Не белгілі
Қазақстандық жартылай қорғаушы Ислам Чесноков Ресей чемпионатында «Крылья Советов» клубында мансабын жалғастыруы мүмкін, деп хабарлайды Sports24.kz.
Клуб инсайдерлерінің ақпараты бойынша, 26 жастағы футболшы қостанайлық «Тоболдан» самаралық «Крылья Советовқа» ауысуға жақын.
Айтуынша, тараптар ойыншының трансфері бойынша келісімге келген, алайда келісім әлі ресми түрде расталған жоқ.
Қазақстан құрамасының жартылай қорғаушысының ауысымы жақын уақытта ресми түрде жарияланады деп күтілуде.
Чесноков қайтадан «Тоболда»
Ислам Чесноков шотландиялық «Хартс» сапындағы кезеңінен кейін қостанайлық «Тоболға» қайта оралды. Шотландиялық клубқа футболшы еркін агент ретінде ауысқан болатын.
Ағымдағы маусымда Чесноков тоғыз матч өткізіп, екі нәтижелі пасымен көзге түсті.
«Тоболға» үш голдық айырмашылықты қайтару керек
Сербиялық «Партизанға» қарсы бірінші кездесуде қостанайлық команда 0:3 есебімен ірі жеңіліске ұшырады. Белградтық клуб сапында Демба Сек, Ибрахима Зубайру және Шака Траоре гол соқты.
Осылайша, қарымта ойында «Тоболға» Конференциялар лигасында жарысты жалғастыру үшін үш голдық айырмашылықты қайтару қажет.
Егер қостанайлық клуб «Партизаннан» өте алса, плей-офф кезеңінде олардың қарсыласы испандық «Хетафе» болады.
Турнирдің өткен кезеңінде «Тобол» литвалық «Паневежис» командасын жеңіп өткен болатын.
