«Чемпиондар лигасына шығу – басты көрсеткіш»: Асхат Тағыберген «Селтикпен» ойындағы «Қайраттың» жетістігі туралы
Қазақстан құрамасының экс-капитаны және «Тобыл» командасының жартылай қорғаушысы Асхат Тағыберген Sports24.KZ сайтына берген сұхбатында «Қайраттың» шотландиялық «Селтик» клубына қарсы тарихи жеңісі мен алматылықтардың Чемпиондар лигасының негізгі кезеңіне шығуын бағалады.
– «Селтикке» қарсы «Қайраттың» ойынын қалай бағалайсыз?
– Команда ұйымшыл әрі өте лайықты ойнады. Мұндай матчтарда ең бастысы – нәтиже. Айтқандай: ойын ұмытылады, ал нәтиже қалады. Ал «Қайраттың» нәтижесі – тарихи. Чемпиондар лигасына шығу – үлкен жетістік.
– Не жақсы шықты, ал нені басқаша істеуге болар еді?
– Үйдегі матчта сәл ғана агрессия жетіспеді. Бірінші таймда гол соғатын сәттер болды – егер гол соқса, ары қарай қорғанысқа көңіл бөлуге болар еді. Дегенмен, жалпы жақсы көрінді.
– Ойыншылар әдемі ойыннан гөрі нәтижеге көбірек мән берді ме?
– Мен бапкер емеспін, бірақ айқын көрініп тұр: команда нәтижеге жұмыс істеді. Тактика өз нәтижесін берді – олар енді Чемпиондар лигасының тобында.
– «Қайраттың» тактикалық жоспары туралы не айтасыз? Пенальти бәрін шешеді деп күттіңіз бе?
– Мұндай матчтарда пенальтиге дайын болу қажет. Мен Темірлан Анарбековке сендім – ол ондай сәттерде өзін сенімді ұстайды. Тіпті ойын кезінде достарыма: «Ол бұл серияны алып шығады» дедім.
– Шабуылда көбіне шешуші соққы жетіспеді. Дастан Сатпаевтың жоқтығы сезілді ме?
– Мүмкін. Дастан шабуылда көп нәрсе береді, бірақ футбол – командалық ойын. Ол – нағыз жауынгер. Жас бола тұра осындай деңгейде ойнауы – үлкен көрсеткіш. Мен оған қуаныштымын және «Челсиде» бәрі сәтті болады деп үміттенемін.
– «Қайрат» көп жағдайда ауаға доп асырды. Мұндай тактика мықты қарсыластарға қарсы тиімді бола ма?
– Қалай ойнаған маңызды емес – асырылған доппен бе, қысқа паспен бе. Маңыздысы – нәтиже. Футболда жалғыз жол жоқ.
– Бұл жеңістің қазақстандық футбол үшін маңызы қандай?
– Бұл – тарихи жеңіс. Қазақстан тарихында тек екі клуб Чемпиондар лигасының топтық кезеңінде ойнады – 2015 жылы «Астана» және енді «Қайрат». Оларға бүкіл ел жанкүйер болды. Ойыннан кейін жігіттерге қоңырау шалып, эмоция үшін алғыс айттым. Чемпионатта біз қарсыласпыз, ал Еуропада – бір командамыз.
– Темірлан Анарбековтің ойынына қандай баға бересіз?
– Ол – Қазақстан құрамасының болашағы. Темірлан сабырлы ойнады, қысымды жеңе білді және еліміздің №1 қақпашысы бола алатынын дәлелдеді.
Алматыда өткен матч негізгі және қосымша уақытта 0:0 есебімен аяқталды, ал пенальти сериясында «Қайрат» «Селтикті» 3:2 есебімен жеңіп шықты. Глазгода өткен бірінші матч та 0:0 есебімен тең аяқталған болатын.
