«Бір-біріне қарама-қарсы»: жаңа матч алдындағы рәсімдер 2026 жылғы әлем чемпионатында енгізіледі
ФИФА басшысы Джанни Инфантино 2026 жылғы әлем чемпионатында жаңартылған матч алдындағы рәсім енгізілетінін хабарлады, деп жазады Sports24.kz.
Бұл жаңашылдықтың мақсаты — турнирдің көріктілігін арттырып, жанкүйерлерді барынша тарту.
Әр ойын алдында тізімге енген барлық футболшылар алаңға шығып, ұлттық гимн орындалған кезде орталық баннердің маңына жиналады.
Турнирдің кейінгі кезеңдерінде бұл рәсім түрлі арнайы эффектілермен, соның ішінде түрлі-түсті түтін мен пиротехникамен толықтырылады.
«Әлем чемпионаты дамыған сайын ойыннан ләззат алудың жаңа жолдарын енгізуді жалғастырамыз. Барлық ойыншылар мен төрешілер ұлттық гимн орындалған сәтте орталық шеңберде бір-біріне қарап тұрғаны — командалар мен стадиондағылар үшін шынайы бірлік, мақтаныш пен эмоция сәті болады. Әлем чемпионаты — әр ойыншы мен әр жанкүйер үшін мереке, ал жаңа матч алдындағы рәсім осыны көрсетеді», – деп келтіреді Инфантиноның сөзін ФИФА-ның ресми сайты FIFA.
Әлем чемпионаты 11 маусым мен 19 шілде аралығында АҚШ, Канада және Мексикада өтеді және тұңғыш рет 48 ұлттық құраманы біріктіреді.