«Бавария» мен «Арсенал» Чемпиондар лигасындағы тартысты матчтан кейін жұлдыздарынан айырылды: жарақаттар туралы не белгілі
21 қазанда өткен Чемпиондар лигасы жалпы кезеңінің үшінші турындағы «Бавария» мен «Арсенал» арасындағы матч (2:2) тек төрт голымен ғана емес, қос команданың негізгі футболшылары алған жарақаттарымен де есте қалды, деп хабарлайды Sports24.kz.
Лондондықтардың вингері Букайо Сака басты зардап шеккен ойыншылардың бірі болды. Ағылшын футболшысы кездесудің алғашқы минуттарында-ақ санның төртбасты бұлшықетін жарақаттап, 10-минутта алаңнан кетуге мәжбүр болды. Оның орнына алаңға Эберечи Эзе шығып, кейін есеп ашты.
Матчтан кейін «Арсеналдың» бас бапкері Микель Артета футболшының жағдайына алаңдайтынын білдірді. Маманның айтуынша, жарақаттың сипаты және ойыншыны соншалықты ерте ауыстыру қажеттілігі алаңдаушылық туғызады. Саканың қалпына келу мерзімі әзірге нақты белгіленген жоқ.
Мюнхендіктер де шығынсыз қалған жоқ. Колумбиялық шабуылшы Луис Диас алаңға 68-минутта шыққанымен, бұлшықетіне байланысты 90-минутта-ақ ауыстырылды. Сонымен қатар футболшы «Арсеналмен» кездесу алдында да жайсыздық сезінген. Осыған байланысты Венсан Компани бастапқыда оны қосалқы құрамда қалдырған.
Германиялық Bild басылымының мәліметінше, медициналық тексеру 29 жастағы колумбиялық футболшының сол жақ санының артқы бөлігіндегі бұлшықет шоғырының аздап жыртылғанын анықтаған. Диас төрт-алты апта аралығында алаңға шыға алмауы мүмкін деп болжануда.
Осылайша, Мюнхендегі тартысты текетірестің қос команда үшін де салдары ауыр болуы мүмкін. «Арсенал» шабуыл шебіндегі көшбасшыларының бірінен айырылу қаупінде тұрса, «Бавария» бірнеше күн бұрын «Лейпцигке» қарсы матчта (6:1) хет-трик жасаған футболшысынан қағылуы мүмкін.
Еске салайық, «Альянц Аренада» өткен кездесу 2:2 есебімен аяқталды. Алаң иелері сапынан Альфонсо Дэвис пен Харри Кейн көзге түссе, Эберечи Эзе мен Деклан Райстың голдары лондондықтарға тең ойын сыйлады.
