«Барселонадағы» 15 жастағы қазақстандық Царукянмен кездесті
Испаниялық «Барселонаның» жүйесінде өнер көрсетіп жүрген 15 жастағы Карим Мендқанов UFC-тің жетекші файтерлерінің бірі Арман Царукянмен кездесті. Футболшы әлеуметтік желіде бірге түскен суретін жариялады, деп хабарлайды Sports24.kz.
Кездесу Царукян «Барселона» мен «Реал» арасындағы «Эль-Класико» матчының құрметті қонағы ретінде барған Каталонияда өтті.
Армян текті ресейлік файтер каталондық клубтың спорттық базасына барып, жас қазақстандықпен әңгімелесті.
Царукян Мендқановты қолдап, оны «Барселона» сапындағы Қазақстан футболының болашақ жұлдызы деп атады. Сондай-ақ спортшы әзілдеп, футболшы негізгі командаға жеткен кезде оған матчқа билет алып бере ала ма деп сұрады.
Мендқанов суретті қысқа жазумен жариялады: «Аңызбен түскен сурет. Үлкен рақмет».
Еске сала кетейік, Орал қаласының тумасы Карим Мендқанов «Барселона» құрылымымен үш жылдық келісімшартқа қол қойған алғашқы қазақстандық футболшы атанды. 2026 жылдың шілдесінде ол каталондық клубқа ресми түрде қосылып, әйгілі «Ла Масия» академиясында дамуын жалғастырды.
Жас жартылай қорғаушы «Барселонаның» 16 жасқа дейінгі командасында өнер көрсетеді және Қазақстанның жасөспірімдер құрамасына шақырту алады.
Арман Царукян UFC-тегі ең танымал белсенді файтерлердің қатарына кіреді.
Ол аралас жекпе-жектегі кәсіби мансабын 2015 жылы бастады, ал төрт жылдан кейін америкалық промоушенде дебют жасады. 2025 жылдың қарашасында Хукерді тұншықтыру әдісімен жеңсе, 2026 жылдың қыркүйегінде Маурисио Руффиді нокаутқа түсірді.
Царукян UFC-тің жеңіл салмақтағы рейтингінде екінші орында тұр. Оның кәсіби мансабында 24 жеңіс пен үш жеңіліс бар.
