«Барселона» шоу көрсетіп, «Реал» сүрінгеннен кейін Ла Лига турнир кестесі қандай
Испанияның Ла Лигасындағы чемпиондық атаққа басты үміткерлер саналатын «Барселона» мен «Реал» 4-турдағы матчтарын өткізді. Төртінші турдың өзінде екі басты фавориттің бірі күтпеген жерден маңызды ұпай жоғалтты, деп хабарлайды Sports24.kz.
«Корольдік клуб» маусымның басында басты қарсыласына жол беріп, «Бетистен» күтпеген жерден 0:1 есебімен жеңіліп қалды. Ал «Барселона» еш қиындыққа тап болмай, «Валенсияны» 5:0 есебімен ойсырата жеңді.
Осылайша, маусым басталған төрт турдан кейін қазіргі чемпион «Барселона» мадридтік клубтан үш ұпайға ұзап кетті.
Сенсация жасаған «Бетис» еншісіндегі тоғыз ұпаймен үздік үштікке кірді. Сондай-ақ Чемпиондар лигасының аймағына «Депортиво» мен «Алавес» енді. Ал «Атлетико» маусымды сәтсіз бастап келеді: төрт матчтан кейін мадридтік команданың еншісінде мүмкін болған 12 ұпайдың жетеуі ғана бар.
«Вильярреал» мен «Валенсия» да маусымды сәтсіз бастады: сәйкесінше екі және бір ұпай. «Барселонадан» ойсырай жеңілген «Жарқанаттар» гол айырмасы -8 көрсеткішімен турнир кестесінің соңында тұр.
Айта кетейік, төртінші турдың қалған матчтары 6 және 7 қыркүйекте өтеді.
