«Астана» ғана емес: ҚПЛ-дің тағы төрт клубының футболшыларға жалақы бойынша қарызы бар
«Астана» ғана емес, ҚПЛ-дің тағы төрт клубы өз ойыншыларына жалақы бойынша қарыз болып отыр, деп хабарлайды Sports24.kz.
Инсайдер әрі журналист Эльдар Аманбаевтің ақпаратына сәйкес, қаржылық қиындықтарға «Жетісу», «Каспий», «Ертіс» және «Алтай» клубтары да тап болған. Өзге мәліметтер жарияланбады.
Бұған дейін «Астана» ойыншыларына жалақы төлеуге қатысты жағдайдың сын көтермейтіні хабарланған еді. Елорда клубы жалақы бойынша қарызға байланысты Қазақстан чемпионатының матчтарына бойкот жариялаған футболшылардың ұжымдық үндеуіне ресми түрде жауап берді.
Елорда клубы қарыздың бар екенін мойындап, футболшыларға клубтың намысын қорғауға деген адалдығы үшін алғыс айтты. Алайда «Астананың» ойыншылардың матчтарға қатысудан бас тартуына байланысты жағдайдан қалай шығатыны жөнінде ештеңе айтылмады.
Еске салайық, «Астана» футболшылары ұжымдық үндеуінде клуб кем дегенде үш айлық жалақы көлеміндегі қарызын өтегенге дейін матчтарға қатысудан бас тартатынын мәлімдеген болатын.
